2023-йисан 2-августдиз 86 йисан яшда аваз Россиядин Федерациядин лайихлу муаллим, Дагъустандин халкьдин муаллим Алискеров Алискер Селимханович рагьметдиз фена. А.С.Алискеров 1937-йисан 12-августдиз ДАССР-дин Хив райондин Хъукьварин хуьре колхозчийрин хизанда дидедиз хьана. 1951-йисуз хуьруьн ирид классдин школа вадралди куьтягьай ам Дербентдин педучилищедиз имтигьанар авачиз кьабулна.
1955-йисуз педучилище акьалтIарна, кьилин тагьсил къачун къаст тир жегьил Ленинан тIварцIихъ галай ДГУ-дин тарихдинни филологиядин факультетдик экечIна. Вад йисуз чирвилер къачурдалай кьулухъ 1960-йисан сентябрдилай Хив райондин Кашанхуьруьн тамам тушир юкьван школада урус чIаланни литературадин муаллим ва завуч яз кIвалахиз эгечIна. Са йисалай урус чIалай хъсан пешекар Хиврин хуьруьн юкьван школадиз – райондин кьилин школадиз хкана. 1967-йисуз Алискер Селимхановичаз райондин образованидин отделда кIвалах теклифна. Ада эвелдай школайрин инспекторвилин, гуьгъуьнлай, 1976-1988-йисара, райОНО-дин заведующийвилин везифаяр тамамарна.
1988-йисалай пенсиядиз фидалди Хивдин юкьван школада урус чIаланни литературадин муаллимвиле кIвалах давамарна. Вири и йисара Алискер Селимхановича, школадин гуманитарный предметрин муаллимрин объединенидин кьиле акъвазна, райондин образованидин хиле тухузвай гьар са мярекатда гуьгьуьллудаказ иштиракнай.
А.С.Алискеров муаллим-новатор тир, ада лап сифтедлай вичикай алакьунар авай методистдикай хьиз малумарнай. Уьлкведин образованидин саки вири махсус изданийра милли школайра урус чIал гунин теориядай ва практикадай адан хейлин метлеблу ва дерин манадин макъалаяр мукьвал-мукьвал акъатиз хьанай.
А.С.Алискерова неинки вичин баркаллу зегьметдалди, гьакIни инсанвилин виниз тир дережайралди юлдашрин, районэгьлийрин арада чIехи гьуьрмет къазанмишна. Ам масадан дерди-гьалдикай хабар кьадай, рикI-гъил ачух, къени къилихрин инсан тир.
Алискер Селимханович кечмиш хьунихъ галаз алакъалу яз чна рагьметлудан хизандиз, мукьва-кьилийриз, дериндай хажалат чIугунивди, башсагълугъвал гузва.
Юлдашрин са десте.
