Мукьвара РД-дин Гьукуматдин Председатель Абдулмуслим Абдулмуслимова «Дагъустан» РГВК ва «Дагъустан» ГТРК каналриз интервью гана. Ада эхиримжи йисара республикада экономикадин, образованидин, здравоохраненидин, туризмдин ва яшайишдин маса хилер вилик тухун, Дагъларин уьлкведиз цIийи инвесторар желб авун патал кьиле тухузвай мярекатрикай, кьабулзавай серенжемрикай ихтилатна. Интервьюдиз тамамдиз винидихъ тIвар кьунвай каналрин «Ютубда» авай аккаунтра килигиз жеда. Агъадихъ чна интервьюдин арада Абдулмуслим Абдулмуслимова къейд авур кар алай са шумуд месэладикай куьрелди малуматар гузва.
«Дагмясо» заводдин суьрсет
А.Абдулмуслимова республикадин кьилевайбуру инвестицийрин гьихьтин проектриз артух фикир гузватIа ва гьихьтин хилера экспортдин гьисабдай бюджетдиз алава такьатар гъиз кIанзаватIа лагьана.
Премьер-министрдин гафаралди, къецепатан уьлквейрай къвезвай инвесторри Дагъустанда хуьруьн майишатдин суьрсет гьялдай карханаяр эцигуниз виридалайни гзаф итиж ийизва.
«Зун гьеле Гьукуматдин Председателдин заместитель тир чIавуз Ирандиз фенай. И уьлкведиз асул гьисабдай хуьруьн майишатдин хел итижлу я. Къачун чна «Дагмясо» кархана. Ам государстводин завод я. Иран, Оман, ОАЭ, Саудиядин Аравия и карханади акъудзавай суьрсет маса къачуз гьазур я. Лагьана кIанда, Дагъустандин як еридин жигьетдай тарифдинди я. Гьавиляй ам маса къачузвайбурун кьадарни гзаф я. И хиле хъсан къазанжияр гъизвайвиляй, инвесторри адаз гзаф фикир гузва», — къейдна Гьукуматдин Председателди.
Логистикадин центраяр
Санкцийрин шартIара транспортдин «Север-Юг» коридор кардик акатнава. И кар фикирда кьуна, къецепатан инвесторрихъ транспортдин логистика вилик тухудай ниятар ава. А.Абдулмуслимова къейд авурвал, республикадин кьиле авайбуру инвесторрихъ галаз кьиле фейи гуьруьшрал Дагъустанда логистикадин центраяр эцигун теклифнава.
«Алай вахтунда Дагъустанда тупунин (оптовый) логистикадин са центрани кардик квач. Эхь, эхиримжи йисара чна емишар хуьдай махсус карханаяр эцигнава, амма абурун гужлувал зайиф я. Алай йисуз Мегьарамдхуьруьн районда, «Сад» КФХ-да, емишар хуьдай чIехи кархана эцигиз гатIуннава.
Кьиблепатан Дагъустанда мад са майишатди – «Полоса» ООО-ди уьлкведа мад санани авачир хьтин багъ кутунва. Инани емишар хуьдай еке кархана эцигзава.
Са гафуналди, республикадихъ авай мумкинвилер фикирда кьуна, чна инвесторриз Дагъустанда логистикадин центр ва суьрсет гьялдай карханаяр эцигуниз эвер гузва», — лагьана премьер-министрди.
Туризмдин хел
Алай вахтунда гьар юкъуз республикадин меркездин аэропортуни 71 авиарейс кьабулзава. Рейсерин кьадар гзаф хьун республикада туризм вилик финихъ галаз алакъалу я.
Премьер-министрдин гафаралди, туризмдиз талукь месэлаяр РД-дин Кьил Сергей Меликован кьетIен гуьзчивилик ква. Мукьвара Сергей Меликова и хилез талукь кьилдин совещание кьиле тухудайвал я. Адан сергьятра аваз, мисал яз, Казбек райондин Дубки поселокда туризм вилик тухун веревирд ийида. И чкадихъ гьихьтин лайихлувилер, гьялна кIанзавай гьихьтин месэлаяр аватIа тайинарда.
«Республикада туризмдин хилез талукь са шумуд проект кьилиз акъудзава. Мисал яз, Каспий гьуьлуьн къерехда туризмдин кластер, шегьер-курорт Къаякент, государстводин жуьреба-жуьре программаяр. Дербентда, Казбек, Гуниб, Хунзах районра туризм вилик тухун патал хейлин серенжемар кьабулзава. Абур вири кьилиз акъатдайдак умуд кутазва. Ихьтин шартIара республикадиз хъсан къазанжияр къазанмишдай мумкинвал жедайдал шак алач. Идалай гъейри, дагъустанвияр патал кIвалахдай вишералди цIийи чкаяр пайда жеда», — лагьана А.Абдулмуслимова.
Агьмед Магьмудов
