Гьикаятчидин гьуьрметдай

И йикъара СтIал Сулейманан райондин Алкьвадар Гьасан эфендидин тIварунихъ галай кьилин ктабханада (ЦБС) лезгийрин тIвар-ван авай писатель ­Зияудин Эфендиеван 120 йисан юбилейдиз талукьарнавай эдебиятдин межлис кьиле фена. Ана ЦБС-дин работникри, яратмишдай интеллигенциядин векилри ва масабуру  иштиракна.

Ктабханада «Советрин девирдин лезги прозадин сифте диб эцигай кас» кьил алаз Зияудин Эфендиеван ктабрин выс­тавка ачухнавай.

З.Эфендиеван уьмуьр­дин­ ва яратмишунрин рекьерикай ЦБС-дин методист Наида Алхасовади (ам мярекатдин тешкилатчини я) ва жаванрин отделдин заведующий Марал Къурбановади гегьенш ва итижлу рахунар авуна, писателдин кьетIен бажарагъ къейдна.

«Куьредин хабарар» газетдин отделдин заведующий, РФ-дин журналистрин ва лезги­ писателрин союздин член, и цIа­ра­рин автор вичин рахунра Зия­удин Эфендиеван гьикаятдин эсеррал­, кьилди къачуртIа, «Кьуьзуьдан суьгьбет», «Магъу дере» гьикаяйрал, «Гъалибвилин пайдах», «Рев­ком»­, «Зардин къирмаж», «Яру-цIа­ру­ кIва­­тIа­лар» повест­рал­ ва «Муькъвел гелер» ро­мандал гегьеншдиз акъвазна­. Мадни ада алава хъувурвал, Зияудин Эфендиева «Зейнабан рехъ», «Гуьлзада», «Салих гьахъ я», «А йикъар алатнава», «Къазимегьамед» драмадин эсе­рарни кхьена, чи уьлкведин стха халкьарин писателрин эсерар лезги чIалаз таржума авуна.

Мярекатдал муаллим ва журналист Райсудин Набиева­ ви­чи, Зияудин Эфендиеваз бахш­на, кхьенвай шиир, медениятдин «Куьредин ярар» центрадин регьбер Агьмедпаша Агьмедпашаева писателдин эсеррай камаллу келимаяр кIелна.

Хазран  Кьасумов