Алкьвадар. И хуьруьн тIвар кьунмазди, чи рикIел анин еке ва баркаллу тарих, хуьряй акъатай, уьлкведиз ва вири дуьньядиз машгьур хьайи камалэгьлияр, алимар, Социализмдин Зегьметдин игитар, шаирар, искусстводин устадар, конструкторар, чIехи дережайрин руководителар къведа. Неинки кьилдин ксар, санлай тамам тухумар.
Къенин суьгьбет лагьайтIа, 2023-йисан 21-июндиз Дагъустан Республикадин Гьукуматдин Председатель Абдулмуслим Абдулмуслимова акъудай (283-р нумрадин) къарардалди Дагъустан Республикадин Гьукуматдин Гьуьрметдин грамота гайи и хуьруьнви, СтIал Сулейманан райондин культурадин отделдин начальникдин заместитель Султанов Жабир Ажимамедовичакай я.
Гьамиша кIвалахдин, къайгъуйрин яцIа авай и касдикай макъала кхьиз эгечIайла, зи рикIел Максим Горькийди лагьай гафар хтана: «Заз зи вири уьмуьрда кIвалахиз кIандай ва чпелай кIвалах алакьдай инсанар халис игитар яз аквада». Заз и келимайрай Жабир Ажимамедовичан «шикил» аквазва. КIвалахдин кабинетда ам жагъурун регьят туш, ам райцентрадал, хуьрера авай культурадин маканра, районда тухузвай культурадинни шадвилин мярекатра датIана аквада…
Жабир Султанов 1963-йисуз дидедиз хьана. Жаван йисарилай манияр лугьунал, кьуьлер авунал рикI алай ва вичихъ и рекьерай алакьунар авай ам, школа акьалтIарна, Дагъустандин культпросветучилищедик экечIна. Анаг акьалтIарай жегьил пешекарди 1983-1986-йисара Дагъустандин манийринни кьуьлерин ва Виридуьньядин машгьур «Лезгинка» госансамблра кIвалахна.
1986-йисуз Жабир Ажимамедович, хизандин гьалар себеб яз, хайи хуьруьз хтана, райондин пионеррин ва школьникрин кIвале педагогвиле кIвалахал акъвазна. И везифаяр ада 12 йисуз кьиле тухвана. И йисара ана цIийи са шумуд кружок кардик кутуна. Ж.Султанова регьбервал гузвай кьуьлердайбурун ансамблди республикада са шумуд конкурсда кIвенкIвечи чкаяр кьуна.
1998-йисуз вичихъ тешкилатчивилин алакьунар авай Жабир Ажимамедович, хуьруьнвийрин тIалабуналди ва райондин руководстводи тереф хуьналди, Алкьвадрин хуьруьн администрациядин кьилин къуллугъдал хкяна. Жавабдар и везифаярни ада 12 йисуз намуслудаказ кьилиз акъудна. И йисара хуьр яшайишдинни экономикадин рекьерай вилик тухун, агьалийрин яшайиш, дуланажагъдин шартIар хъсанарун патал Жабир Султанова еке зегьмет чIугуна. Поселенидик акатзавай Алкьвадрал ва Сардархуьре куьчеяр къайдадиз гъана, са шумуд куьчеда къир цана, агьалияр хъвадай ва дигидай целди таъминарна, культурадин, образованидин, здравоохраненидин идарайрин кIвалах хъсанарна. Са гафуналди, Алкьвадрин хуьр районда хъсанбурун жергедиз акъудна.
2010-йисан декабрдин вацралай инихъ Жабир Ажимамедовича, чна винидихъ лагьайвал, райондин культурадин отделдин начальникдин заместитель яз кIвалахзава. Адан асул везифайрик муниципалитетдин культурадин вири идарайрин кIвалах сад-садав кьадайвал авун, халкьдин художественный сеняткарвилер кIвачел ахкьалдарун, культурадин ирсинин памятникар хуьн акатзава. Жабир Султанован кIвалахдин майданрин гегьеншвал къалурун патал заз ихьтин рекъемар гъиз кIанзава: культурадин отделдик И.Тагьирован тIварунихъ галай ЦТКНР, хуьрерин клубрин 35 филиал, Алкьвадар Гьасан эфендидин тIварунихъ галай центральный библиотека, чкайрал алай адан 28 филиал, художественный ва музыкальный школаяр, 8 музей акатзава. Мадни районда авай тарихдин ва культурадин 187 памятник ава. 2018-йисалай Сардархуьре ва Зизика цIилер галай тапракар гьазурдай «УстIаррин кIвал» кардик ква. Районда хъенчIин къапар ва чуьнгуьрар гьазурдай мастерскойри кIвалахзава. Ибуру Ж. Султанован гьар йикъан къайгъуярни артухарзава.
Алай йисуз Кьасумхуьрел лезгийрин къагьриманвилин «Шарвили» эпосдин сувар кьиле тухуникни Жабир Ажимамедовича еке пай кутуна. Районда гьар йисуз СтIал Сулейманан шииратдин, гьакIни йисан календарда авай суваррин, культурадин лишанлу йикъар кьиле тухуник, райондин яратмишдай коллективар международный конкурсриз, фестивалриз рекье туник Ж.Султанова еке пай кутазва. Ада райондин аялрин яратмишунрин кIвале кардик квай кьуьлерин «Леккур» ансамблдиз гузвай куьмекни екеди я.
— Жабир Ажимамедовичакай рахадайла, завай анжах разивилин келимаяр лугьуз жеда, — лугьузва райондин культурадин отделдин начальник Майрудин Бабаханова. – Адаз пешедин рекьяй дерин чирвилер, девлетлу тежриба ава. Везифайрив ам жавабдарвал гьисс авуналди эгечIзава. Ада насигьатчивилин еке кIвалахни тухузва. Алатай йисуз «Халкьдин коллектив» тIвар къачур «Кьасумхуьруьн далдамчияр» ансамбль кIвачел ахкьалдар хъувуна, общественный бинейраллаз «Юный кюринец» хореографиядин студия тухузва, акьалтзавай несилдиз вичи Дагъустандин манийринни кьуьлерин ва «Лезгинка» госансамблра къачур чирвилер ва вердишвилер гузва. Са гафуналди, Жабир Ажимамедович пешедин устад, коллективдин рикI ва чархачи я.
Жабир Султанова районда насигьатчивилин, общественный еке кIвалахни тухузва. Кьилди къачуртIа, ам районда кардик квай терроризмдиз акси комиссиядин член я. Ада школайра кIелзавайбурухъ ва жегьилрихъ галаз терроризмдиз ва экстремизмдиз акси ва абурун вилик пад кьунин еке кIвалах тухузва.
— Жабир Ажимамедович вичин хиве авай везифайрив жавабдарвал гьиссна эгечIзавай ксарикай сад я, — лугьузва райондин администрациядин кьилин сад лагьай заместитель Лацис Оружева. – Ахлакьдин, низамдин рекьяйни ам чешне я. Чна адан кIвалахдилай гзаф разивалзава.
Ж.Султанов чешнелу, гьуьрметлу хизандин кьил, низамлу веледрин буба я.
Жабир Ажимамедовичан яргъал йисарин намуслу зегьмет Дагъустан Республикадин культурадин министерстводин, райондин администрациядин, культурадин отделдин, общественный организацийрин патай гьуьрметдин грамотаяр, маса шабагьар гуналди къейднава.
Дагъустандин халкьдин шаир Майрудин Бабаханован са шиирда ихьтин цIарар ава: «… За вичивай анжах са кар тIалабда: Яшамиш хьун тIал-квал квачиз яргъалди». Дагъустан Республикадин Гьукуматдин Гьуьрметдин грамота ва мукьвара къейд авур 60 йисан юбилей мубарак авуналди, чаз Жабир Султановахъ мягькем сагъламвал, хизанда бахтлувал, кIвалахда агалкьунар ва яргъал йисарин уьмуьр хьана кIанзава.
Хазран Кьасумов
