Каспийск шегьерда 3-сеферда Гьуьлерин дяведин флотдин югъ къейдна
30-июлдиз Каспийск шегьерда Гьуьлерин дяведин флотдин (ВМФ) йикъаз талукьарнавай мярекатар кьиле фена. Анра республикадин премьер-министр Абдулмуслим Абдулмуслимовани иштиракна.
РД-дин Гьукуматдин пресс-къуллугъди «Лезги газетдиз» хабар гайивал, мярекатар гьуьлуьн параддилай гатIунна. А.Абдулмуслимов ва Каспийский флотилиядин контр-адмирал Александр Пешков флотдин къуллугъчийриз пешекарвилин сувар мубарак авун патал катерда аваз гьуьлуьн лепейрал сирнавзавай гимийрин жергедиз мукьва хьана.
Къейд ийин хьи, гьуьлуьн парадда ракетайрин, артиллериядин, сергьятар хуьдай гимийри иштиракна. Абурун арада «Дагъустан», «Дербент», «Мегьамед Гьажиев», «Волгодонск» ва маса гимияр авай. Каспийский флотилиядин парадди нубатдин сеферда чи къудратлу уьлкведин армиядихъ авай мумкинвилерни къуват къалурна.
Мярекатдин кьвед лагьай паюна парадда иштиракзавай флотилиядин къуллугъчийри, республикадин министерствойринни ведомствойрин векилри, чкадин агьалийри интернетдин куьмекдалди РФ-дин Президент Владимир Путинан тебрикрихъ яб акална. Къейд ийин хьи, и юкъуз уьлкведин регьберди Санкт-Петербургда кьиле фейи гьуьлерин дяведин кьилин парадда иштиракна.
Гуьгъуьнлай Абдулмуслим Абдулмуслимова флотдин кьилевайбуруз, къуллугъчийриз Дагъустандин Кьил Сергей Меликован патай ВМФ-дин югъ мубаракна:
«Заз РД-дин Кьил Сергей Меликован ва кьилди жуван патай квез пешекарвилин сувар мубаракиз кIанзава. Им викIегь инсанрин, ватанпересрин, чпин пешедиз гьакьван вафалу кьегьалрин сувар я. Гьуьлуьхъ галаз анжах къаст авай инсанривай чпин уьмуьрар алакъалу ийиз жеда. Малум тирвал, флотилия Астрахандай Каспийск шегьердиз куьчарнава. Им Дагъустан патал лишанлу вакъиа я, вучиз лагьайтIа Дагъларин уьлкведин акьалтзавай несилрихъ чпин вилералди, мукьувай игитвилин, ватанпересвилин чешнейриз килигдай, флотдин къуллугъчийривай чпиз чирвилер къачудай мумкинвал хьанва», — лагьана А.Абдулмуслимова.
Александр Пешкова къейд авурвал, флотдин парад цIи Каспийск шегьерда пуд лагьай сеферда кьиле тухвана. Мярекатра санлай къачурла 400-ев агакьна флотдин къуллугъчийри, МЧС-дин ва сергьятар хуьдай къуллугъдин векилри, 30-далай виниз гимийри иштиракна.
ВМФ-дин йикъан сергьятра аваз Абдулмуслим Абдулмуслимова са жерге къуллугъчийрив государстводин шабагьарни вахкана. Кьилди къачуртIа, РФ-дин Президент Владимир Путинан Указдалди, 1-рангдин капитан Андрей Канищев — Ушакован, РД-дин Кьил Сергей Меликован Указдалди, Украинада кьиле физвай махсус серенжемда къалурнавай кьегьалвилерай подполковник Константин Кутейников, младший сержант Къайиб Тагьиров – «ВикIегьвал къалурунай», 1-рангдин капитан Вячеслав Новоженин Амет-Хан Султанан тIварцIихъ галай медалриз лайихлу хьана.
Гьуьлуьн параддин мярекатрикай гегьеншдиз РД-дин Гьукуматдин сайтдай кIелиз жеда.
Агьмед Магьмудов
