Писатель, филологиядин илимрин кандидат, РД-дин лайихлу юрист, лап хъсан крариз къаюмвалзавай меценат Абил Абдурагьманович Межидован и йикъара 65 йис тамам жезва. Сардар Абил яратмишунрин яцIа ава, кагьулвал чин тийиз, халкьдиз къуллугъзава. И кардихъ галаз алакъалу яз, чна лугьузва:

Ви гьисабрай, хва я вун кьве дидедин.
Векил я жал чара тир кьве уьлкведин?
Амма чаз вун хва я вири дидейрин,
Векилни я Чилел вири уьлквейрин!

На ви хивез къачунвай пар – заланвал
Тир хьиз я чаз селлер атай Кьулан вацI!
Кьилеллай жив шагьид я а селлерин.
Вун ана са живе хьиз я эллериз.

Мердвал ганва гьакьван михьи къилихдиз.
Кутаз жедач ам кубутрин синихдик.
Гагь Афгъанда, гагь Мугъанда, Жалгъанда,
На ви жуьре кьуьл илисна къалгъандал!

Мизан – тереф даим ава алмасда,
ЧIални хуьзва мидявилер кармашдай.
Дидейрин хва жеда жал мад масакIа?
Къилинж амаз, хкяда жал пасакIар…

ЧIалан Сардар, муьгьуьббатдин Абил я,
Итимвилиз, Лигимвилиз къабил я!..

Ваз юбилей тебрикзавай «Лезги газетдин» редакциядин коллектив.