Чкадин муниципалитетрин кьилер хуьрерин агьалийрихъ галаз мукьувай алакъада хьунихъ еке метлеб ава. Хуьрера жемятдин дердияр  чирдай, вилик эцигнавай жуьреба-жуьре месэлаяр гьялдай гуьруьшар кьиле тухун адетдиз элкъвенва. Мукьвара ихьтин са мярекат Курхуьрел кьиле фена.

Ам ачухай Н.Гьажиева сифте гаф хуьруьн администрациядин кьил Р.Гьажалиеваз гана. Ада агьалияр кIватI хьунин метлебдикай лагьана. Адан гафаралди, и мярекатдал агьалийривай хуьруьн майишатда арадал къвезвай месэлайрикай, яшайишдинни дуланажагъдин шар­тIар хъсанарунин карда гьалтзавай татугайвилерикай ачухдиз лугьуз, тIал алай месэлаяр веревирд ийиз жеда.

Гуьгъуьнлай анал жегьилрин насигьатчияр тир В.Велибегов,Ф.Гьажиев, А.Селимов, фермер В.Саругъланов, ­му­алли­мар тир Р.Тагъиев, Р.Набиева, Б.Гьажиев, Э.Рустамова ва масабур рахана. Аб­у­ру­ тербиядиз, ахлакьдиз, яша­йишдин шартIа­риз, хъвадай ва дигидай ятар кьенятлудаказ ва дуьздаказ ишлемишуниз, жегьил­рихъ галаз кIвалах тухуниз талукь месэлаяр къарагъарна. Кьилди къачуртIа, хуьруьн агъа кьиле яша­миш жезвай агьалийри чпин калер, нехирдик кутун тавуна, гьакI ахъайнава. Гьайванри, жугъунар кукIвариз, еке зиянар гузвайдакай, жегьилар геждалди куьчейра жезвайдакай, булахар чIур­завайдакай лагьана.

Анал рахай хуьруьн администрациядин кьил Р.Гьажалиева, имам  Гь.Ама­ханова къейд авурвал, администрацияди хуьруьн активистрихъ галаз хейлин крар авунва. Инал къейднавай кимивилер арадай акъудун патал серенжемар кьабулда.

Райсудин Набиев