19-июлдиз Махачкъалада, Ленинан комсомолдин тIварцIихъ галай паркуна, Кавказ патал кьиле фейи женг акьалтIайдалай инихъ 80 йис тамам хьуниз талукьарнавай мярекат кьиле фена. Ана РД-дин Кьил Сергей Меликова, Исламдин бизнесдин международный ассоциациядин президент Марат Къабаева ва масабуру иштиракна.

Республикадин Кьили къейд авурвал, Кавказ патал женгина гъалиб хьун фашизм терг авунин эвел тир. Ватандин ЧIехи дяведин тарихда и женг чIехибурукай сад яз гьатнава. Ам 450 юкъуз давам хьанай.

«И женгини сифте нубатда Закавказьедай Мукьвал тир шаркь патаз фидай рехъ кьаз кIанзавай фашистрин планар тIач авунай. Им чи чIехи бубайри къалурай зурба кьегьалвал я. Тарихдай малум тирвал, и женгина саки миллиондилай гзаф советрин аскерар телеф хьанай.

Рейхстагдал Гъалибвилин Пайдах акIурайдалай кьулухъ 78 йис арадай фейила, фашистар мад кьил хкажиз алахънава. Гьа девирдин гъалибчи несилрин хтулрини птулри и кардин вилик пад кьадайдал шак алач…», — лагьана С.Меликова.

Чи мухбир