Алатай ислендиз Махачкъалада, республикадин «Табасарандин нурар» газетдин редакцияда, журналистар Томскдай мугьман хьанвай Анна Мишустинадихъ галаз гуьруьшмиш хьана. Июндин вацра Египетдин меркез Каир шегьерда цин кIаникай сирнав авунай жаванрин арада дуьньядин кIвенкIвечивал патал акъажунра А.Мишустинади къизилдин (400 метрдиз сирнав авунай) ва гимишдин (800 метрдиз сирнав авунай) медалар къазанмишна. Ибур адан сифтегьан агалкьунар туш…
Малум хьайивал, Аннадин «дувулар» Дагъустандай я. Вичин ери-бине Хив райондин Вертиль хуьряй тир адан чIехи буба (дидедин патай) Мегьамедали Мегьамедов 1972-йисалай Томскдин областда яшамиш хьана. 20 йисалай виниз вахтунда Томскдин райондин электросетрин идарадиз регьбервал гана. Алай вахтунда ам Манасда яшамиш жезва. Хтул руш гьар гатуз адан патав хквезва. М.Мегьамедова вичини и гуьруьшда иштиракна. Ада вичин хтул рушан спортдин рекьикай куьрелди суьгьбетна.
— Аннадин 9 йис тирла, ам сифте яз и спортдин секциядиз фена. Акьван гагьди ам чIехи теннисдал, гимнастикадал, балетдал машгъул хьана. Хтул сирнав авунин спортдиз гъайиди зун я. Фад атун лазим тир, 9 йис геж я лугьудайбурни кими тушир. Амма Аннадин сифтегьан тренерди рушахъ кьетIенвал авайди гьасятда кьатIана. Ам ягъалмиш хьанач. Са куьруь вахтунилай Аннади хъсан нетижаяр къалурна — Россиядин ва Сибирдин кубокар къазанмишна. Телевизордай Елена Исинбаевадикай нубатдин сеферда дуьньядин чемпионка хьанвайди малумарзавайла, Аннади заз икI лагьана: «Буба, зунни Хив райондиз чемпионвилин тIвар къазанмишна хкведа», — рикIел хкана чIехи бубади.
14 йиса аваз, ам Россиядин спортдин мастервилин тIварцIиз лайихлу хьана. Алай йисуз, гила кьвед лагьай сефер яз, ам Россиядин хкянавай командадик кутунва. ИкI, уьлкведин хкянавай командадик кваз 2021-йисуз Санкт-Петербургда кьиле фейи Россиядин чемпионатда ада гимишдин медаль къазанмишна. Ам акъажунрин виридалайни хъсан спортсменка яз гьисабна. Аннади 400-далай 1, 5 км-дал кьван мензилриз сирнавзава.
Алай вахтунда Аннадин 16 йис я. Ам 11-классдиз акъатнава, мектебда хъсан къиметар аваз кIелзава. Ам михьидаказ ингилис чIалалди рахазва. Рушан гележегдин планрикай суьгьбетдай мадни чир хьайивал, адаз вичин уьмуьр спортдихъ, тренервилин кIвалахдихъ галаз алакъалу ийидай ният ава. Спортдин рекье (къведай йисалай ада вичин устадвал чIехибурун командадик кваз къалурда) агалкьунар къазанмишунихъ галаз сад хьиз, адан планрик къведай йисуз ЕГЭ-яр агалкьунралди вахкун ква.
Рагнеда Рамалданова
