8-июлдиз чи уьлкведа къейдзавай хизандин, муьгьуьббатдин ва вафалувилин йикъан сергьятра аваз, яргъал йисара санал яшамиш жезвай чешнелу хизанар тебрик авун хъсан адетдиз элкъвенва. ЦIини гзаф чкайра и хъсан адетдиз вафалувал хвена. ИкI, СтIал Сулейманан райондин кьил Саид Темирханова Агъа СтIалрин Къазмайрилай тир Жабраил ва Альбина Аслановринни Экенрин хуьряй тир Алим ва Индира Гьажикъурбановрин хизанрив «За любовь и верность» медалар шад гьалара вахкана. Идакай чаз райадминистрациядин пресс-къуллугъди хабар гана.
С.Темирханова кьве хизанни арада дуствал ва разивал аваз яргъал йисара яшамиш жезвайди, аялар обществодин лайихлу членар яз тербияламишайди, муьгьуьббат ва вафалувал аваз хизандин ивирар мягькемарайди, хуьруьн ва райондин агьалийрин арада гьуьрмет къазанмишайди къейдна.
— Мягькем хизан – бахтлувилин замин, обществодин дурумлувал къалурзавай лишан я. Куьне хизандин институтдин кесерлувал ва виниз тир дережа хуьзва. Лугьуз кIанзава хьи, къуй жезмай кьван гзаф жегьил хизанри квелай чешне къачурай. Квевай, куь тежрибадикай менфят къачуна, уьмуьрдин четин уламрай экъечIдай, сад тир къарар кьабулдай алакьунар чиррай. Квехъ чандин сагъвал, мадни яргъал ва бахтлу уьмуьрар хьурай! — лагьана ада. – Сувар рикIин сидкьидай за вири районэгьлийризни мубаракзава. Къуй чи виридан кьилел ислягь цав, чи кIвалерани берекатар бул хьурай! РикIел хуьх: хизан инсандихъ авай виридалайни багьади я. Куь хизанар хуьх!
Аслановрин ва Гьажикъурбановрин хизанри РД-дин зегьметдин ва яшайишдин рекьяй виликди финин министерстводиз ва райондин кьиле авай ксариз чпин хизанриз кьетIен фикир гунай сагърай лагьана. Хизанда, школада ва обществода дуьз тербия гунилай социумдин хушбахтлувал аслу тирди къейдна. КIвале диде-бубайрин арада дуьзгуьн рафтарвилер хьунилай — аялрин гележег.
Рагнеда Рамалданова
