Израилдин къарар

Израилди Украинадиз Урусатдиз акси дяведин гьерекатра ишлемишдай яракьар чара тийидай къарар кьабулнава. Идакай «Лента.ru» чешмеди хабар гузва.

Киевда авай Израилдин векил Михаэль Бродскийди «Зеркало недели» изданидиз ганвай интервьюда къейд авурвал, яракьар гуз тахьунин себеб Иерусалимди ара-ара дяведин серенжемар кьиле тухунихъ галаз алакъалу я.

Дипломатдин гафаралди, Украинадиз яракьар ахъайзавай уьлквейрин 99 процент НАТО-дин членар я. Израилдилай тафаватлу яз, абуру дяведин гьерекатра иштиракзавач. Идалай гъейри, эгер садлагьана Израилдал са уьл­кведи гьужумайтIа, ада анжах са вичин хсуси къуватрик умуд кутада. НАТО-дик акатзавай уьлквейри лагьайтIа, коллективный хатасузвал хуьнин рекьяй икьрар кутIуннава.

«Гьавиляй Украина Израилдиз НАТО-дик акатзавай уьлквейриз килигзавай «вилерай» килигун дуьз туш», — къейдна Бродскийди.

Эвер гана

Республикадин партиядин патай США-дин президент хкягъунин сечкийра иштиракдай кандидат Вивек Рамасвамиди Украина НАТО-диз кьабулунин гьакъин­дай вичин фикирар лагьана.

Кандидатди гьисабзавайвал, Киевди вич НАТО-диз кьабулун патал ийизвай эвер гунар ахварай ават тавуна къекъведайдан (лунатик) амалрив гекъигна. Адан фикирдалди, и карди Урусатдинни США-дин арада ядерный дяве арадал атуниз рехъ ачухда.

«Им фикирдиз гъиз жедай кIвалах туш. Жув президентдин къуллугъдал хьайи чIавуз зун регьбер хьанвай демократиядиз акси «къемедадин» эсердик акатдач. Вучиз рагъакIидай патан уьлквейри гьар юкъуз «ицитIдай суьгьуьрчидин» гъиляй гьамбардин кьифер незватIа, зун паталди сир яз амукьзава», — къейдна ада.

Рамасвамиди США-дин президент Джо Байденаз «итим хьуниз» ва Украинадиз Вашингтон ам НАТО-дик хьуниз акси тирди къалуруниз эвер гана.

Меземмет авуна

Украинадин президент Владимир Зеленскийдик ада къецепатан уьлквейра­ авай чIавуз, дяве себеб яз, Украинадай ма­са уьлквейриз куьч хьуниз мажбур хьайи украинвияр гьисаба кьазвач лагьана тахсир кутунва. Ам анжах вичин хсуси­ месэлаяр гьялунал машгъул я, — гьисабза­ва виликдай Киевдин гьукумдин кьиле­ хьайи Леонид Кучмадин экс-советник Олег Соскина.

«Зеленский гзаф уьлквейриз мугьман хьана, амма гьич санани ада анриз катнавай украинвийрихъ галаз са гуьруьшни кьиле тухванач», — меземмет авуна ада Украинадин президент.

Соскина гьисабзавайвал, Зеленский Украина патал чара кас я ва ам адан халкьдивайни яргъа ава. И кардихъ галаз алакъалу яз, сиясатчиди уьлкведа виликамаз цIийи президент хкядай сечкияр кьиле  тухунин игьтияж авайди къейдна.

Депутатдин меслят

Эгер къуншидиз къанунди тайинарнавай къайдайрал амал тавуна, эцигунар кьиле тухуз кIанзаватIа, а кардихъ галаз рази хьана кIандач, — гьисабзава Госдумадин депутат Сергей Гаврилова.

Адан фикирдалди, и карди патав гвай чилин участок маса гудайвал хьайитIа, адан къимет агъуз хьуниз таъсирда. Мисал яз, эцигзавай дараматдин цал участокрин умуми сергьятдиз мукьва яз хкажзава. Гуьгъуьнлай ада хъен арадал гъида. Идалай гъейри, къайдайрал амал тавуна, эцигнавай кIвал маса къачузвай касдизни алава дердияр арадал атун ва къуншиди суддиз вугун мумкин я.

РикIел хкин, алай йисан майдин вацра РФ-дин гьукуматди кьабулнавай къарардал асаслу яз, дачайра къайдайрал амал тавуна эцигнавай дараматар чукIурунин хаталувал ава. Гьавиляй бинедилай къанундин шартIар вилив хвейитIа, хъсан я.

ЛДПР-дин теклиф

ЛДПР-дин патай Госдумадин депутат­ри, кьиле фракциядин регьбер Леонид Слуцкий аваз, аялар авай ва 10 йисалай гзаф вахтунда санал яшамиш жезвай хизанриз пулсуз чилин участок чара авун къалурнавай къанундин проект теклифдайвал я. Идакай ТАСС-ди хабар гузва.

Слуцкийди къейд авурвал, проектдин гьакъиндай 30 йикъан къене РФ-дин гьукуматди разивал гайитIа, ам Госдумада депутатрин иштираквал аваз веревирддайвал я.

ЛДПР-дин регьбердин фикирдалди, цIийи къанунди агьалияр гзаф кьадарда шегьерриз куьч хьунин вилик пад кьадай мумкинвал гуда. «Шегьерра кьакьан гьавайрин кIвалер хкажунилай усадьбайра, дачайра гъвечIи кIвалер эцигунал элячIна кIанда. И кар кьилиз акъудун патал чил маса къачудай мумкинвал авачирбурувай, вири шартIарал амал авуна, цIийи къанундикай менфят къачуз жеда», — лагьана Л.Слуцкийди.

Германиядай — Херсондиз

Херсондин областдин агьалийриз куьмек яз, Германиядай недай-хъвадай суьрсет, яшайишда герек къведай затIар (гуманитарный груз) рекье твадайвал я. Идакай «Новости» РИА-диз Крымдин парламентдин са комитетдин кьил Юрий Гемпела хабар гана.

Адан гафаралди, рекье твазвай затIар Германиядин агьалийри кIватIнавайбур я. Гуманитарный пар авай улакьрихъ галаз санал Херсондин областдиз къецепатан уьлкведин жемиятдин векил Хайнрих Гинцни атун вилив хуьзва. Адахъ чкадин агьалийрин яшайишдин шартIарихъ галаз мукьувай таниш жедай фикир ава.

РикIел хкин, Херсондин область 2022-йисан сентябрдин вацра кьиле тухвай референдумдин нетижада Урусатдин субъект хьана. Украина и кардихъ галаз рази хьанач ва областдал гьужумар авун давамарзава.

«Лента.ru» чешмедин делилралди, алай вахтунда Херсондин областдин 75 процент мулкар Урусатдин гуьзчивилик ква. Днепрдин эрчIи пата авай мулкара, Херсон шегьерни кваз, Украинади агъавалзава.

Севрехъ галаз бягьс

Индиядин Нарейнапер тIвар алай хуьре чкадин агьалияр (пуд кас) кицIни галаз нехирдай хтун тавур малар жагъуриз тамуз рекье гьатна. Ина абурал дуьньяда виридалайни хаталуди яз гьисабзавай севре (медведь-губач) гьужумна. Вагьши гьайванди инсанар вичин шарагар патал хаталувал яз кьабулна.

Кьве кас тарариз акьахиз агакьна, амма 40 йис хьанвай Гасиярамаз вагьшидикай катдай мумкинвал хьанач. Севре вичин иесидал гьужумнавайди акурла, кицI куьмекдиз фена. Севрен ва кицIин арада бягьс кьиле физвай чIавуз Гасиярамни тарциз акьах хъувуна. Бягьсни кицI «гъалиб хьуналди» акьалтIна, адалай сев чукуриз алакьна.

Севрен гьужумрикди Гасиярамал сагъламвилиз са акьван еке зиян авачир хирер-кьацIар хьана.

Гьазурайди – Агьмед  Магьмудов