Вахтар дегиш хьайитIани, Ватандиз, халкьдиз къуллугъ авур намуслу инсанрин тIварар садрани рикIелай алатдач.

Зи ихтилат СтIал Сулейманан райондин Герейханован хуьруькай, ана зегьмет чIугур камаллу рухвайрикайни рушарикай я. Ахьтинбурукай яз, заз багъманчи хьайи Разуев Азизакай ихтилатиз кIанзава.

Разуев Азиз Пирсено­вич 1922-йисуз виликан Кьа­сумхуьруьн райондин­ Ци­цIерхуьре лежбер Пирсенан хизанда дидедиз­ хьана. Хуьре яшайиш че­­тин яз акуна,  хизан 1930-йисуз­ Герейханован­ хуьруьз эвичI­на. Гьеле 8 йисавай аял яз, Азиза диде-бубадихъ галаз вичивай жедай кIвалахар  ийиз хьана. Герейханован­ сов­хоздин 2 отделенида Ази­за багълара, питомникра зегьмет чIугуна. Багъларал ашукь хьайи адакай, вичин чирвилер къвердавай хкажиз, совхозда кIвенкIвечи багъманчи  хьана. Совхоздин руководстводиз адан кIвалахар акуна,  адал емишрин багъдин бригадирвал ихтибарна.

Бригадади планар артухни алаз тамамарзавай. Азизан тIвар совхоздин Гьуьрметдин доскада пайда хьана. Са шумуд­ра адаз пулдин премияр, грамотаяр гана. Азиз Пирсеновичан тIвар районда, республикада сейли хьана.

1944-йисуз Азиз фронтдиз тухвана. Гьа йисан декабрдин эхирра,  залан хер хьана,  госпиталдиз аватна. Идалай кьулухъ  хуьруьз хтана.

Ада багълара кIвалахар давамар хъувуна. Азизан тIвар йи­къалай-къуз машгьур жез хьана. КIелна, пешекарвал къа­чунвачиртIани, адаз багъманчивилин вири сирер хъсандаказ чир хьанвай. Гьа икI, Азизакай совхозда, районда тIвар-ван авай багъманчи-бригадир жезва.

Азиз Пирсеновичан зегьмет «Соцсоревнованидин отличник», «Дагъустандин багъманчивилин ва уьзуьмчивилин­ отличник»  лишанралди къейднава. Дяведа авайла, адаз  «Жуьрэтлу­виляй», «Германиядал гъалиб хьунай», гуьгъуьнин йисара «Гьа­къисагъ зегьметдай»,  «Гъалибвилин 20 йис» ва маса шабагьар гана. Азиз Пирсенович 1956-йисалай КПСС-дин член, «Зегьметдин ветеран» тIварцIин, грамотайрин сагьиб тир.

1947-йисуз Азиз Пирсеновича захитIви Абдулазизан руш Халумагъадихъ галаз кьисметар сад авуна. Хизанда 4 гадани 6 руш хьана.

Разуева Халумагъадини уьмуьрдин юлдаш Азизахъ галаз, къуьн-къуьне туна, совхоздин багълара намуслудаказ кIвалахна. Гьукуматди Халумагъадин зегьмет Ленинан орден гуналди къейдна. ТIварни райондин, хуьруьн Гьуьр­метдин доскада хьана. Адаз цIудралди грамотаяр, пулдин премияр гана. Азиз 1988-йисуз, Халумагъа 2006-йисуз рагьметдиз фена. Герейханован 2-хуьре фаракъатнава.

Азизан чIехи хва Разуди Герейханован хуьруьн 1-школада физкультурадин муаллим яз кIвалахна. Алай вахтунда пенсияда ава. Кьвед лагьай хва Муса МВД-дин майор,  Райфудин сов­хозда рабочий, Фейзудин МВД-дин къуллугъчи я. Алай вахтунда пенсияда ава. Рушар, чпин хизанар хьана, гьарна яшамиш  жезва.

Фейзудина СтIал-Къазмайрилай тир Али­метов Абдурагьманан руш Раисадихъ галаз сирер сад авуна. Хизанда  4 рушни са хва ава. Гада Артура икьрардалди  къуллугъзава. Ам Сирияда  кьиле фейи женгерин гьерекатрин ветеран я.

Азиз ва Халумагъа Разуеври кутур камаллу чIехи хизандиз алай вахтундани хуьре, районда,  адалай яргъарани гьуьрметзава. Чна абурал дамахзава.

Вадим  Жамалдинов