Алатай гьафтеда Дагъустандин здравоохраненидин министр Татьяна Беляева Россиядин Минздравдин радиологиядин НМИЦ-дин экспертрихъ галаз гуьруьшмиш хьана. Идакай чаз министерстводин пресс-къуллугъди хабар гана.
Малум хьайивал, Москвадай чи республикадиз экспертар «Милли медицинадин ахтармишунрин центрайрин кIвалах вилик тухун» федеральный проект кьилиз акъудунин сергьятра аваз атанвай. Абурун фикирдик республикада онкологиядин хиляй агьалийрив агакьарзавай медицинадин куьмек ахтармишун ва и жигьетдай кIвалах хъсанарун патал теклифар гун квай. Министрди къейд авурвал, алай вахтунда республикада чкайрал вахтунда амаз онкология диагностика авуниз, «Здравоохраненидин сифтегьан хилен модернизация» Программа кьилиз акъудунин сергьятра аваз, лазим тадаракар маса къачуна ишлемишуни куьмекзава.
Винидихъ къалурнавай чешмедин малуматда мадни хабар ганвайвал, Москвадай атанвай экспертар Республикадин онкоцентрада (РОЦ) ва РКБ-да (Республикадин клиническая больница), гьакIни Дагъустандин шегьерра ва районра онкологиядин хиляй агьалийрив медицинадин куьмекар агакьарун патал яратмишнавай шартIарихъ галаз таниш хьана.
— Республикада онкокъуллугъди виликди мягькем камар къачунвайди аквазва. Имни агьалияр и жуьредин азаррикди кьинин дуьшуьшар тIимил хьуни тестикьарзава. И жигьетдай яз, къенин юкъуз РОЦ-да, РОБ-да, федеральный клиникайрин дережада аваз, кьетIен, четин операцияр кьилиз акъудуни мадни хъсандиз шагьидвалзава, — къейдна Россиядин Минздравдин регионрин идарайрин кIвалахдин координатор Екатерина Сысоевади.
Мугьманри-экспертри мадни къейд авурвал, алай вахтунда Дагъустанда онкологиядин хилен 50 процентдилай виниз операцияр лапароскопиядин къайдада (малоинвазивно) кьилиз акъудзава. И хел мадни вилик тухун пландик кутунва.
Гуьруьшдин эхирдай Т.Беляевади Дагъустандин медцентрайрин кьиле авай ксариз агьалияр сагъарунин карда телемедицинадикай менфят къачуниз эвер гана. И къуллугъ мадни виликди тухудай стратегия арадал гъанва.
Чи мухбир
