Республикадин садакай масадак акатдай азар­рин центрадин (РЦИБ) СПИД-дин вилик пад кьадай ва адахъ галаз женг чIугвадай пешекарри ВИЧ ва вирусди арадал гъизвай гепатитар квани, квачни ахтармишун патал датIана серенжемар кьиле тухузва. Сир туш, залан азар квайди вахтунда чир хьунихъ гьам ам сагъарунал, гьамни ада бедендин сагъламвилиз еке зиян гунал гьалтайла, еке метлеб ава. И йикъара  РЦИБ-ди «Жуванбур» ДРО-дихъ галаз санал Махачкъаладин реабилитациядин центрада сагъламвал мягькемарзавай ва шегьердин гьуьлел ял язавай ксарин сагъламвал ахтармишна.

Азар квани, квачни тади гьалда чирдай ­(эк­спресс-тестирование) къайдада пешекарри­ ВИЧ­, гепатит А, гепатит С, сифилис дуьздал акъу­дун патал и юкъуз реабилитациядин центрада 36 кас ахтармишна. Абурукай садак ВИЧ квайди чир хьана. Адан сагъламвилин гьал мадни дериндай ахтармишдай серенжемар кьабулна, лазим терапия тайинарна. Мадни 6 касдик гепатит С ва кьве касдикни гепатит В квайди дуьздал акъудна. ЧIулав лекьин кIвалах къайдадикай хкатуниз рехъ тагун патал абурузни лазим терапия тайинарна.

Гьуьлел ял язавайбурукай ахтармишунин разивал гайибур асул гьисабдай туристар (Барнаулдай — 8, Липецкдай — 4) тир. Абурун арада ВИЧ квай кас малум хьанач. Кьве касдик — гепатит С, садак – гепатит В, мадни кьве касдик сифилис квайди винел акъатна.

РЦИБ-дин пешекарри, мугьманар чеб яшамиш жезвай чкайриз хъфейла, вуч авун, гьихьтин серенжемар кьабулун лазим ятIа, гъавурда туна.

Чи мухбир