Дагъустандин вузра агалкьунралди кIелзавай лезги гадаяр, рушар тIимил авач. Ахьтинбурукай сад бине Докъузпара райондин Текийрин хуьряй тир Мадина Серветовна Мурсалова я.
Махачкъаладин юкьван мектебрикай сад акьалтIарайдалай кьулухъ Мадина ДГТУ-дик экечIна. Алай вахтунда ада ина экономикада ва управленида информациядин къурулушрин факультетда (факультет информационных систем в экономике и управлении) кIелзава.
17-июндиз Санкт-Петербургда «Суверенное развитие — основа справедливого мира» лишандик кваз международный дережадин экономикадин форум акьалтI хьана. Форумдин кар алай мярекат РФ-дин Президент Владимир Путина иштиракай пленарный заседание тир. Адан сергьятра аваз гъвечIи карчивал вилик тухуниз, производстводин ва логистикадин центрайриз куьмекар гуниз, алай девирдин шартIара санлай уьлкве вилик тухуниз талукь месэлаяр веревирдна.
Форумдин кIвалахда чи макъаладин кьилин игит Мадина Мурсаловадини иштиракна. Москва шегьерда РАНХиГС-да менеджментдай Вирироссиядин кубок патал кьиле фейи акъажунрин финалистка хьайи лезги рушаз форумда университетдин илимдин уьмуьрда активнидаказ иштиракзавайвиляй, жегьилрин крарин рекьяй Федеральный Агентстводи (Росмолодежь) ва «Росконгресс» фондуни теклифнавай.
Лагьана кIанда, Мадинади акьалтзавай несилрин векилрихъ галаз кIвалахзава, жуьреба-жуьре мярекатар тешкилзава, анра иштиракзава. Ам «Кьиблепатан Дагъустандин жегьилрин Союз» тешкилатдин член, Махачкъала шегьердин собранидин патав кардик квай Жегьилрин парламентдин депутат я.
Мадина Мурсаловади гьисабзавайвал, уьмуьрда тайин дережайрив агакьна кIанзаватIа, гьар са касди вилик макьсад эцигун герек я. И дуьшуьшда фена кIанзавай мензил атIуз регьят жеда.
Чун гъавурда акьурвал, Мадинади вичин вилик са шумуд макьсад эцигнава. И кар адан агалкьунрай ашкара жезва. Кьилди къачуртIа, адахъ «Центр поддержки предпринимательства РД» ГАУ-дин, международный дережада «История России» лишандик кваз кьиле фейи интернет-олимпиададин, менеджментдай Вирироссиядин жегьилрин кубокдин, GMC-бизнес идара авунин жигьетдай кьиле фейи РФ-дин чемпионатдин милли паюнин, Вирироссиядин жегьилрин илимдинни тежрибадин «Наука и творчество: вклад молодёжи» конференциядин, «Маркетинговые инструменты для получения выгоды и пользы» программадин сертификатар ава. Ибурулай гъейри, адаз экономикадин форумда активнидаказ иштиракунай «Опора России» тешкилатди, ДГТУ-ди разивилин чарар, РД-дин финансрин рекьяй савадлувал хкаждай центради Гьуьрметдин грамота ганва. Мадинади налогрин месэлайриз талукь Вирироссиядин олимпиадада, МГУ-ди уьлкведин дережада аваз тешкилай «Наука 0+ «Создавая будущее» фестивалда кIвенкIвечи чкаяр кьуна.
Аферин Мадинадиз! Чахъ чешне къачуниз лайихлу ихьтин жегьилар гьикьван гзаф хьайитIа, чи халкьдин тIварни гьакьван машгьур жеда. Къуй викIегь, акьуллу лезги рушахъ гележегда мадни еке агалкьунар хьурай!
Агьмед Магьмудов
