СтIал Сулейманан райондин Герейханован сад лагьай хуьруьн гуьне патан магьлейра экверин месэла муракабди яз са шумуд йис я. Адан патахъай чна, Кьасумхуьруьн подстанциядин ва абонентрин къуллугъдин векилрин кьиливни фена, хабардар авунай. За халкьдин патай са шумуд йисан вилик абонентрин къуллугъдин регьбердин тIварцIел арзани кхьенай. Амма арадал атай затIни хьанач.

Лугьун лазим я хьи, райондин кьилевай ксар, гьар са идарадиз физ, кIвалах ахтармишун кьиле фидай кар туш. Гьар сада вичин хиве авай везифаяр намуслувилелди кьилиз акъудун лазим я. Са 4-5 йис идалай вилик Герейханован хуьруьн Пушкинан тIварунихъ галай куьчеда къуншидин сала авай кьуранвай кьакьан  къавахдин тар токдин симерин гьалкъада гьатнавай. И кардин патахъай электросетдин идара хабардар авурди тир. Амма…

Акъатнавай гарун хура акъвазиз тахьай кьурай тар, симер фенвай шалманни, токдин дестекни галаз ярх хьана, къуншидин гьаятдиз аватна. Бахтунай хьиз, линияда ток авачиз хьана, я анрал къугъвазвай аяларни алачир.

Къунши яз, расалмиш хьайи­ла,  ярх хьанвай къавах ва  токдин­ симер авай гьалдин  шикилни яна, за «Лезги газетдиз» ракъурнай. Чух­сагъул, макъала газетдизни акъатна. Хьайи кIвалахдикай хабардар авур са вахтунилай иниз пешекарар атана, ктIанвай шалман акIур хъувуна,  хъфена.

Ихьтин гьалар мад авачиз туш, акIурнавай шалманар иски хьанва­,  тарарин арайрай симер физва.

Гила вилик квай кьилин месэла ам я хьи,  халкьдив агакьзавай токдин гужлувал 160, 150 вольтдилай тIимил я. Гьа са вахтунда электричество ишлемишдай алатар гзаф хьанва: холодильник, морозильник, парталар чуьхуьдай машинар ва икI мад. Хуьруьн «Сухой поселокдиз» экв къвезвай трансформатордал гуж акьалтзава, кIвалер гзаф хьанва, адан такьат без жезвач. Няни хьайила, холодильникар, ток бес тежез, гужа гьатзава, кузва. Экв зайиф хьайила, йифен вахтунда кIвале са кIвалахни жезвач, иллаки — хъуьтIуьн вахтунда. Са бязи чкайрилай акIурнавай дестекар къайдадикай хкатнава.

«Сухой поселокда» эквер зайиф хьунин, иллаки Пушкинан куьчедин агъа кьилиз экв бес тахьунин себеб ам я хьи, эцигнавай трансформатор лазим кьадардилай гъвечIиди я, ада экв гузвай  кIвалер санбар ава.

ТIал алай месэлаяр мадни авачиз туш. Са 2 йис идалай вилик «Со­ветский-Ташкапур» рехъ ремонт­ авуна. И кIвалах кьиле тухвай ксариз чухсагъул. Советрин уьлк­ве­дин вахтунда Герейханован сад лагьай хуьруьн постунилай хуьруьн вини кьилиз кьван рекьин къерехда экверин дестекар­ акIурнавайди тир. Гьукумат чкIай­ла, постунилай хуьруьхъди 2-3 виш метрдин мензилда авай дестекар тарашна. И мензил 5 куьчедиз агьалияр хъфизвай чка я, анай аялар школадиз физва, нянин вахтунда мал-къара хквезва. Инал са шумудра гьар жуьре дуьшуьшарни хьайиди я. Рекьер ремонт авурла, хуьруьн вини кьилиз кьван цIийи шалманар акIурна, эквер тухванва. Амма постунал­ кьван рекье эквер тун садан ри­кIелни атанач. И магьлейра Ватан хуьз Украинадиз фенвай кьегьал рухвайрин хизанар, аялар, рагьметдиз фенвай Гьадисов Шамилан хизанарни яшамиш жезва.

Заз чидайвал,  гьар са гьакимди вич алай чкадиз, вичин везифайриз кьетIен фикир гун герек я. Хуьруьн юкьвай физвай шегьре рекьин са пад мичIи, муькуь пад экуь жедайди туш. Белки гила кьванни ксанвайбур ахварай аватин.

Вадим  Жамалдинов