Гад гьарай я. Гьавиляй лугьунни ийизва: гатун са йикъа хъуьтIуьн са варз тухарда.
Гату СтIал Сулейманан райондин хуьруьн майишатдин карханайрин (2 СПОК-дин, 24 карханадин, 48 КФХ-дин), гьакIни 960 арендатордин ва 20 агъзурдалай виниз кьилдин ксарин куьмекчи майишатрин къайгъуярни артухарнава. Идакай чаз вичихъ галаз авур суьгьбетда райондин хуьруьн майишатдин ва суьрсетдин управленидин начальникдин заместитель Къазагьмед Абумуслимова лагьана.
— Алай вахтунда карханаяр ва кьилдин ксар общественный мал-къарадиз алафар гьазурунал машгъул я, — къейдна Къ. Абумуслимова. – Идалайни гъейри, районда гад агудунизни гьазурвилер аквазва. И йикъара гьакIни багълара, уьзуьмлухра, теплицайрин майишатра, маса хилерани кIвалахар къизгъин я.
Малум хьайивал, райондин хуьруьн майишатдин карханайри, КФХ-ри ва ЛПХ-ри мал-къара патал гьар йисуз 30000 тонндилай виниз векъи алаф, асул гьисабдай самар ва векьер гьазурзава.
Гъиле авай йисузни карханаяр алафар гьазурунив виликамаз хъсан гьазурвилер акуналди эгечIнава. Икьван чIавалди 17000 тонндилай виниз алафар гьазурнава, идакай яз «Горец» ООО-ди ва «АлиЯк» ООО-ди 1150 тонн сенажни кутунва.
Векьер асул гьисабдай векьин уьруьшрай, чIурухъан чкайрай, багъларин арайрай, са ва гзаф йисарин векьер цанвай чкайрай язава. ЦIинин йисуз виринра къалин ва кьакьан векь ава. Идан нетижада 1 гектардин майдандай 240-250 туьк акъатзава, яни 4,5 тонн векьер. Им виликан йисарилай гзаф я. Артухан векь хуьруьн майишатдин шей гьасилзавайбуру къунши районриз маса гузва, са туьк — 130-150 манатдай.
Мал-къарадикай рахайтIа, санлай районда 11450 — ири карч алай ва 14980 гъвечIи карч алай гьайванар ава. Мекьи тушир хъуьтIуьн гьаваяр фикирда кьуртIа, и кьадар мал-къарадиз авай векъи векьин игьтияжди 20 агъзур тонн тешкилда.
Пешекарри цIинин йисуз 29-30 агъзур тонн векьер хьун гуьзлемишзава.
Магьсулдарвиликай рахайтIа, 2023-йисан бегьер патал «Горец» ООО-да 20 гектарда, «Зардиян» ООО-да 40 гектарда, «Агростал» ООО-да 40 гектарда, «Новый путь» СПК-да 48 гектарда, «Шах-Абузар» СПК-да 15 гектарда, «Казиахмедов Р. А.» КФХ-да 40 гектарда, «Шайдаев З. Г.» ЛПХ-да 13 гектарда, «Ярахмедов А. А.» ЛПХ-да 30 гектарда зулун магьсулар цана. НикIерин гьал, санлай къачурла, писди туш.
2023-йисан гатфарихъай вири жуьрейрин майишатра 198 гектарда гатфарин магьсулар, 291 гектарда са ва гзаф йисарин векь цана. 190 гектардиз миянардай шейэр вегьена. Анагар тарифдай гьалда ава.
Районда зулун ва гатфарин магьсулар 421 гектардай кIватI хъийида. Юкьван гьисабдалди районда никIерин гектардин бегьерлувал 22-23 центнер, дигизвай никIерин — 25-26 центнер хьун гуьзлемишзава.
Гад агудиз Зардияндин майишатрилай гатIунда, дагъдин чкада авай Кьелякь участокдилай акьалтIарда.
Алай йисуз 1000-1100 тонндилай тIимил тушиз техил хьун гуьзлемишзава.
Гад агуддай техника, ремонт хъувуна, гьазур я. Лазимвал хьайитIа, комбайнияр ва маса техника къунши районрай гъида.
Хазран Кьасумов
