Эбеди рикIел хуьн… И кардиз эвел ава, амма эхир авач. Ватандин чIехи дяве куьтягь хьана бегьем йисар алатнаватIани, гел галачиз квахьнавайбурухъ багърийрин вил гилани галама. Дяведин несилдин аялрикай гила чIехи бубаяр хьанва.

Вахтар йигиндаказ физва, дяве куьтягь хьана саки 80 йис жезва. Украинадин кьил В.Зеленскийди Донбасс кукIварун вичин кьилин мурад я лугьузва. Амма цIийи фашистрин къуватрин хура дирибаш рухваяр акъвазнава.

РФ-дин Президентдин Указдал­ди­ Россиядин армияди 2022-йисан 24­-­фев­ралдилай Украинада военный махсус серенжем тухузва. Адан кьилин метлеб 8 йисан къене и мулкариз гуьлле гузвайбур акъвазарун ва республикайрин халкьариз куьмек гун я.

Дагъустандин халкьарин векилрини­, Ватандин ЧIехи дяведа игитвилер къалуриз, Гъалибвилик чпин пай гьикI ку­тунатIа, абурун  хтулри, птулрини, мах­сус серенжемда иштиракиз, жуьрэтлувал, зурба кьегьалвилер къалурзава.

Дербент райондин Белиж поселок­дайни махсус серенжемда хейлин  кье­гьалри иштиракзава. Гьажиев Марат 1991-йисуз Белиж поселокда бинеяр Кьурагь райондин Штулай тир Альберт Минетуллаевичан хизанда ди­дедиз хьана. Белиждин 2-нумрадин­ школада ада юкьван образование къачуна. И йисара ам спортдин са шумуд жуьредални машгъул хьана. Адан рикIе, вичин ими, РФ-дин лайихлу летчик, генерал-майор Тагьир Гьажиевалай чешне къачуна, военный къуллугъ ийиз фидай къаст авай.

ЧIехибурун меслятдалди ам Да­гъус­тандин технический университетдин «Право, таможенное дело» факультетдик экечIна. Са йисуз кIелайла, адаз Россиядин Армиядин жергейриз эверна. ИкI, 2010-2011-йисара Марата Новосибирскда авай ВВС-дин час­тара къуллугъна. Армиядай хтайла, ада университетда кIелун давамарна ва агалкьунралди анаг акьалтIарна. 4-курсуниз акъатайла, кIелунивай къерех тахьана, ада МО-дихъ галаз конт­ракт кутIунна, сержант яз къуллугъ ийиз­ гатIунна. Гьи аскердиз генерал жез кIан жедач! 2016-йисуз ам Смоленскда авай Военный академиядик экечIна. Къуллугъда агалкьунар ва кIе­лунрани хъсан чирвилер къалурнавай Маратаз­ лейтенантдин чин гузва. Академия акьал­тIарнавай жегьил лейтенант вз­вод­­дин командирвиле Владикавказдиз рекье твазва. Кьве йисалай ам, зенитно-ракетный батареядин командир яз, Чечен Республикадин Борзоеда авай мотострелковый девизиядин полкуниз ракъурна. 2019-йисуз ина адаз старший лейтенантдин чин гузва. 2021-йисуз ам мотострелковый полкунин командирвиле тайинарзава.

2022-йисан февралдилай капитан Марат Гьажиева военный махсус серенжемда викIегьдаказ иштиракзава. Полкунин командирдин везифаяр тамамарзавай вахтунда ада вич пешекарвилин рекьяй гьазур тир, кар алакьдай, тешкилатчивилин алакьунар авай, зегьметдал рикI алай ва истемишдай офицер хьиз къалурна. Адахъ, вичин вилик эцигай гьихьтин хьайитIани везифаяр тамамдиз кьилиз акъудна, хъсан нетижаяр къазанмишдай къилих ава.

Нубатдин офицервилин чин гун патал гьазурнавай къуллугъдин  характеристикада адан командирди икI кхьизва: «Марат Гьажиев са рехнени квачиз къуллугъ авунай, везифайрив гьакъисагъвилелди эгечIунай, виниз тир низамдай ва мураддихъ ялунай виридаз чешне я. Вилик эцигнавай метлебдив агакьун патал кьетIивална, адетдинди тушир къарар кьабулна, уьмуьрдиз кечирмишдай алакьун авай кас я. Вичин гъилик квай аскерривай еке истемишунар ийизвай хьиз, ада гьар садан кьилдин кьетIенвилерни фикирда кьуна, абурун къайгъударвални ийизва. Вичин подразделенида авай гьар са къуллугъчидин ахлакь тербиядинни психикадин вири кьатIунар, гьалар адаз хъсандиз чида, абурун яшайишдин ва хсуси месэлаяр гьялуниз дерин фикир гуда, абурухъ галаз датIана тербиядин ва женгинин пешекарвилин дережа хкажун патал кIвалах тухуда».

2022-йисан 24-февралдилай ада ха­талувал авай шартIара душманди гьавадай ягъуникай полкунин командадин пунктни подразделенияр хуьзва ва вичин везифаяр намуслудаказ тамамарзава.

Махсус операция кьиле физвай вахтунда ада вичин гъилик квайбурузни, гьужумдикай хуьдай маса подразделенийризни дерин чирвал авай командирди хьиз регьбервал гана.

Гьавадин гьужумдикай хуьдай мотострелковый полкунин начальник Марат Гьажиева Абрикосовка поселок къачудай женгера аскерриз кар чиз регьбервал гана, чи полкар далдамишна, душмандин БПЛА-яр тергна.

2022-йисан июндин вацра Пологи хуьруьн къвалав женгер кьиле фидайла, ада чпин полкунин подразделенияр алай чкаяр тайинарзавай Украинадин БПЛА яна, душмандив гьавадин разведка тухуз тунач. Женг физвай вахтунда М. Гьажиевални хер хьана, ам госпиталдиз тухвана.

22 юкъуз госпиталда хирер сагъар­на, сагъламвал мягькем хъхьайла, ам къуллугъ давамриз вичин частуниз хъфена.

Махсус серенжемдин женгера, чандилайни гъил къачуна къалурай ди­ри­башвиляй Гьажиев Марат Альберто­­вич «Жуьрэтлувиляй» ор­­дендиз ва «Дирибашвиляй» медалдиз лайихлу хьана.

М.Гьажиев гьуьрметлу хизандин кьил я. Ада цуьквер хьтин кьве рушаз тербия гузва.

Сабурлудаказ махсус серенжем гъа­­либвилелди акьалтIарунал вил алай, кье­гьалвилелди къуллугъзавай Мара­тан­ дах Альберт Минетуллаевичаз, адан диде Заремадиз ва ахьтин вишералди маса хизанризни ватанперес веледар тербияламишунай сагърай лугьуз кIанзава. Ватан, чил, кIвал хуьз, вилик жергейра авай гьар сад са игит я.

Къагьриман  Ибрагьимов