4-июлдиз РД-дин Гьукуматдин Председатель Абдулмуслим Абдулмуслимова СКФО-дин регионрин хуьруьн туризмдин рекьяй кардик квай туроператоррин Ассоциациядин конференцияда иштиракна. Мярекат Каспийск шегьерда кьиле фена. Ана гьакIни РФ-дин Госдумадин, уьлкведин хуьруьн майишатдин ва регионрин министерствойрин, хуьруьн майишатдин карханайрин, туризмдин фирмайрин векилри иштиракна.
А.Абдулмуслимова къейд авурвал, Дагъустандихъ хуьруьн туризм вилик тухунин карда еке мумкинвилер ава. Республикадин чилерин 80 процент хуьруьн майишатдин макьсаддинбур я. Чкадин агьалийрин пудай са пай аграрный производстводал машгъул жезва.
«Чна хуьруьн майишатда бубайрилай атанвай адетдин къайдаяр хвенва, абуру республикадиз къвезвай туристрин фикир чпел желбзава. Дагъларин уьлкведиз мугьман жезвай туристрин кьадарни йисалай-суз гзаф жезва. Абуру итиж ийизвай чкайрин чIехи пай дагълух хуьрера ава. И кардихъ галаз алакъалу яз, чна республикада хуьруьн туризм вилик финик еке умудар кутунва», — лагьана премьер-министрди.
Гуьгъуьнлай конференциядал рахай РФ-дин хуьруьн майишатдин министерстводин хуьруьн мулкар вилик тухудай Департаментдин директордин заместитель Рената Бибарсовади хуьруьн туризм вилик тухуниз государстводи гузвай куьмекдикай ва грантрин конкурсрикай ихтилатна. Адан гафарай малум хьайивал, уьлкведа хуьруьн туризмдиз талукь 124 проект кардик ква ва агротуризмдин хиле Дагъустан РФ-дин регионрин арада кIвенкIвечи жергейра хьун лазим я. «ИкI хьун патал Дагъустандихъ неинки дагълар, вилик фенвай хуьруьн майишат, Каспий гьуьл, халкьарин девлетлу тарих, гьакIни мугьманперес, зегьметдал рикI алай инсанарни ава», — лагьана ада.
Конференциядикай гегьеншдиз РД-дин Гьукуматдин официальный сайтдай кIелиз жеда.
«Лезги газет»
