Медалар вахкана

4-июндиз Кьурагь райондин администрацияда мектебар вири вадар аваз акьалтIарай аялрив шабагьар вахкуниз талукьарнавай мярекат кьиле фена. Ана муниципалитетдин кьил Замир Азизова, администрациядин жавабдар къуллугъчийри, директорри, муаллимри, диде-бубайри иштиракна.

Аялри кIелунрин рекье къазанмишнавай агалкьунар къейд авуналди, Замир Азизова абурухъ идалай кьулухъ мадни кьакьан кукIушар муьтIуьгъардай къуватар хьун алхишна:

«Уьмуьрда хкянавай рекьяй викIегьвилелди вилик алад. Чна куьн хьтин аялрал шадвалзава, дамахзава», — лагьана, Замир Азизова 8 аялдив «КIелунра – кьетIен агалкьунрай» медалар вахкана. Абурун арада Амина Велибегова, Рагьимат Агьмедова, Эльдар Вагьабов (Кьурагь), Алибег Загьирбегов (Аладаш), Хадижа Керимханова, Тейли Азизова (КIири), Мадина Султанова (Моллакент) ва Сагьибат Рагьимова (КьепIир) ава.

Сенатордин такьатрихъ

Докъузпара районда Федерациядин Советдин член Сулейман Керимова чара авунвай пулдин такьатрихъ хци месэлаяр гьялиз гатIуннава. Кьилди къачуртIа, муниципалитетдин хуьрера бязи участокра цин гьалдай фенвай турбаяр цIийибуралди эвезун патал герек материалар маса къачуна. Усугъчай хуьре и жигьетдай тайин кIвалахар кьиле тухвана акьалтIарнава. Турбаяр хъвадай цин патахъай татугай гьалар авай вири хуьрера дегишардайвал я.

Цин месэладилай гъейри, райондин кьилевайбуру энергетикадин хиле авай месэлайризни кьетIен фикир гузва. Сифте нубатда Авадан хуьре электричестводихъ галаз алакъалу гьалар къайдадик кухтадайвал я. Иллаки хъуьтIуьн вахтунда мукьвал-мукьвал эквер хкатуни чкадин агьалияр икрагьзавай. И месэла гьялун патал хуьруьз цIийи 2 трансформатор, ракьукайни бетондикай авунвай 30 шалман ва сим чара авунва.

Къейд ийин хьи, цIийи трасформаторар Къурушрин, Текийрин, Мискискарин ва Килерин хуьрерани эцигда. ЦIийи Къаракуьре хуьр патал кIарасдин 10 шалманни бес кьадар сим маса къачунва.

РикIел хкин, Сулейман Керимова, вичин хайи райондиз куьмек яз, 100 миллион манат пул чара авунва.

ЦIийи паркар

Государстводин «Шегьердин къулай шартIар» программадин сергьятра аваз Мегьарамдхуьруьн районда алай йисуз пуд парк ишлемишиз вахкудайвал я. ЦIийи паркар Муьгъверганрин, Кркарин ва Филерин хуьрера пайда жеда.

Мукьвара муниципалитетдин кьилин везифаяр вахтуналди тамамарзавай Фейруддин Рагьимханов чкадал эцигунрин кIвалахар кьиле физвай гьаларихъ галаз таниш хьана.

Бегьер кIватIзава

Мегьарамдхуьруьн райондин зегьметкешар хутарин бегьер кIватI хъийиз эгечIнава.

Уружбайрин хуьряй тир багъманчи Тажидин Агьмедова саки 3 гектардин майданра хутарин къелемар цанва. Сифте бегьер ада и йикъара маса гун патал Красноярскдиз рекье тунва.

Тежрибалу багъманчидин гафаралди, хутарин «Десертная» лугьудай жуьре хъсан дад авайди ва яргъал рекьиз тухуз жедайди (чIур тахьана, амукьзава) я. Гьавиляй гьам чкадин, гьамни уьлкведин маса регионрин базарра и жуьредин хутар маса къачузвай муьштерийрин кьадарни бул я.

Мегьарамдхуьруьн райондин администрациядин хуьруьн майишатдин управленидин делилралди,  муниципалитетда хутар, санлай къачурла, 592, 5 гектарда кутунва. Алатай йисуз и майданрай 9 агъзурни 158 тонн бегьер кIватI хъувунай. ЦIи и рекъем 9500 тонндив агакьун мумкин я.

Суварин паяр

Къурбанд сувариз Ахцегь районда игьтияж авай ва Украинада кьиле физвай махсус серенжемда гуьгьуьллудаказ иштиракзавай ва телеф хьайи аскеррин хизанрин арада садакьадин як пайна. Абурун кьадар 600-лай алатнавай.

Ахцегь райондин администрациядин телеграм-каналди хабар гузвайвал, мергьяматлувилин серенжем Палчаевринни Пашаеврин хизанри тешкилнавай.

Ватан патал

СтIал Сулейманан райондин администрациядин пресс-къуллугъди хабар гузвайвал, мукьвара Украинада кьиле физвай махсус серенжемда Кьасумхуьрелай тир Тагьир Агьметулагьович Маметов телеф хьана. Ам хайи хуьре кучукна. Ватан патал чан къурбанд авур аскердин 37 йис тир.

Мобилизациядин сергьятра аваз Ватандин вилик вичин хивевай буржи кьилиз акъудзавай Т.Маметова реактивный артиллериядин дивизиондин улакь гьалзавайдан везифаяр тамамарзавай. Женгера къалурай викIегьвилерай адаз (кьейидалай кьулухъ) РФ-дин Президент В.Путинан Указдалди «Жуьрэтлувиляй» орден гана.

Т.Маметов кучукзавай чIавуз тазиятдин мярекатда, телеф хьанвайдан мукьва-кьилийрилай, ярар-дустарилай гъейри, райондин администрациядин векилрини иштиракна. Маметоврин хизандиз муниципалитетдин кьил Саид Темирханова, адан сад лагьай заместитель Лацис Оружева, депутатрин собранидин председатель Штибег Мегьамедханова ва масабуру, дериндай хажалат чIугунивди, башсагълугъвал гана.

Агьмед  Магьмудов