РФ-дин Президент Владимир Путин Дербентдиз атай чIавуз ам мукьувай акваз хьанач лугьуз, 8 йис хьанвай Раисат Акиповади гзаф гьайифар чIугвазвай. И кар себеб яз ам шехьзавай ара рушан дидеди видеодиз къачуна ва ролик социальный сетра чукIурна.
Видео Президентдизни акур хьтинди я. Владимир Путина Раисатни адан бубани диде Москвада, Кремлда, кьабулна. Гьа икI, Раисатан мурадни кьилиз акъатна.
«Зун Дербентдай хъфейдалай кьулухъ заз шехьзавай ви шикил къалурна. Гьелбетда, завай а вахтунда майдандал акъвазнавай гьар са инсандихъ галаз кьилди рахаз жедачир. Амма ви гьайифдин накъвари зи гуьгьуьлар серинарна. Завай мукьвал-мукьвал Москвадай патарал физ тежезвайвиляй за ваз, дидени буба галаз, зи патав атун теклифна», — лагьана Президентди руш Кремлда кьабулзавай чIавуз.
Владимир Путина Раисатаз Кремлда гъвечIи сиягьат авуна, вичин кабинетда авай телефондай зенгерна, ам РФ-дин Гьукуматдин Председатель Михаил Мишустинахъ, финансрин министр Антон Силуановахъ галаз танишарна. А.Силуановахъ галаз рахазвай чIавуз В.Путина министрдиз са жерге месэлаяр гьялна акьалтIарун патал Дагъустандиз пулдин такьатар бес тежезвайдакай лагьана. Силуанова Кеферпатан Кавказдин региондиз 5 миллиард манат пул чара ийидайдакай малумарна.
«Сагърай, Антон Германович! Вуна, Раисат, Дагъустан патал 5 миллиард манат пул жагъурна. Ша», — лагьана Президентди рушаз ва абур санал чай хъваз фена.
Гуьгъуьнлай РД-дин Кьил Сергей Меликова къейд авурвал, чара ийизвай алава такьатар Дербент шегьер вилик тухуниз, кьилди къачуртIа, яшайишдин объектар эцигуниз ва инфраструктура цIийи хъувуниз харжда.
Гаф кватай чкадал лагьана кIанда, Акиповрин хизандихъ галаз Москвада 4-июлдиз РД-дин Кьил Сергей Меликовани гуьруьш кьиле тухвана.
Чи мухбир
