РД-дин Кьилин пресс-къуллугъди хабар гузвайвал, Запорожьедин областдин Михайловский райондай Дагъустандиз ял ягъиз аялар атанва. Гатун са пай абуру Каспий гьуьлуьн къерехда авай сагъламвал мягькемардай лагерда акъудда.
«Аялар «Анжи мастер» тIвар алай лагерди кьабулнава. И комплекс Каспий гьуьлуьн къерехда экIя хьанва. Гьуьлел ял ягъунилай гъейри, гъвечIи мугьманар патал Дагъларин уьлкведин пипIериз жуьреба-жуьре сиягьатарни тешкилда», — къейднава малуматда.
Къарабудахкент райондин администрациядин пресс-къуллугъдин делилралди, Запорожьедин областдай, санлай къачурла, 50 аял атанва. Алатай гьяд юкъуз абур меркезда РД-дин образованидин ва илимдин министерстводин векилрини жегьил артистри кьабулна.
«Дагъустанда акъуддай вахт куь уьмуьрда рикIелай алат тийидайди жедайдак чна умуд кутазва. Буюр – Дагъларин уьлкведиз», — лагьана, мугьманар кьабулдайла, РД-дин образованидин ва илимдин министрдин сад лагьай заместитель Аида Далгатовади.
Чи мухбир
