Дагъустандин хипехъанри куьчери малдарвилин чилерилай гатун яйлахриз 70 процентдилай виниз суьруьяр хканва, хабар гузва РД-дин хуьруьн майишатдин ва недай суьрсетдин министерстводи.
Санлай къачурла, куьчери малдарвилин мулкарай 1,4 миллион лапаг дагълариз хкун пландик ква. 1 миллион гьайван чкайрив агакьнава. Абурукай тахминан 200 агъзур лапаг машинра аваз, 850 агъзур – кIвачи-кIвачи хканва. Идалайни гъейри, хабар гузвайвал, яйлахриз ири карч алай 24,2 агъзур гьайван ва 450 балкIан хканва.
Дахадаев, Ахцегь, Хив, Шамил, Хасавюрт, Къизляр, Казбек районрин майишатри куьчери малдарвилин мулкарай кIвалин гьайванар тамамдаказ акъуднава, Къули, Леваши, Акуша ва Тарумовский районрин майишатри и кар давамарзава.
Къейд ийин, къишлахрай яйлахриз куьчарзавай гьайванриз талукь яз санитариядинни азаррин вилик пад кьунин серенжемар кьабулзава.
Чи мухбир
