Дагъустандин электроэнергия ишлемишзавайбур «Россетар Кеферпатан Кавказ» ПАО-диз 8 миллиард манатдилай гзаф буржлу хьанва, хабар гузва компаниядин пресс-къуллугъди.

«2023-йисан январь-май варцара «Россетар Кеферпатан Кавказ» ПАО-дин филиал тир   «Дагэнерго»  компаниядин  муьштерийри ишлемишнавай электроэнергиядай 4,6 миллиард манат гьакъи ганва.  Абурукай кьилдин ксарал 1,8 миллиард манат гьалтзава, карханайрал – 2,8 миллиард. Алатай йисан и вахтунда  3,9 миллиарддилай  гзаф пул ганвай (кьилдин ксари – 1,5 млрд манат, карханайри – 2,4 млрд манатдилай гзаф)», — лугьузва малуматда.

Къейдзавайвал, «Россетар Кеферпатан Кавказ» ПАО-диз региондин мулкунал электроэнергия агакьарун заминвалзавай таъминчидин дережа гайидалай кьулухъ (2020-йисан 1-июль) вири жуьре муьштерияр (кьилдин ксарни, карханаярни)  санлай къачурла 8,3 миллиард манат буржлу хьанва.

«Анжах алай йисан вад вацран вахтунда и бурж 1,9 миллиард манатдин артух хьанва. Эгер электроэнергия агакьарун заминвалзавай виликан таъминчи – «ДЭСК» ПАО – кардик хьайи вахтни фикирда кьуртIа,  республикадин вири жуьре муьштерияр компаниядиз 20,2 миллиард манат буржлу я», — лугьузва пресс-къуллугъдин векилди.

Чи  мухбир