Инсан вичин уьмуьрда хъсан гел таз алахъда. И кар алакьай инсанди вич бахтлуди яз гьисабда. Ахьтинбурукай яз СтIал Сулейманан райондин Гуьнепатан хуьрерикай сад тир Улу-Гъетягъай тир Гьажимуслимов Гьажимуслиман тIвар кьаз жеда.

Ам 1923-йисуз лежбердин хизан­да­ дидедиз хьана. Хуьруьн школа­да­ 1938-йисуз 7-класс акьалтIарна. Хъсан къи­метар аваз школа куьтягьайла ам Дербентдин педучилищедик­ экечIна. Ина кIелдай са мумкинвални тахьай Гьа­жимуслим Азербайжандин Пута­ ­по­селокда яшамиш жезвай Успагьи эмедин патав фена. Ана ада фабрич­но-за­водской школа куьтягьна. Слесарь-токарвилин пеше къачур ам Лухбатандин нафтIадин мяденда кIвалахал акъвазна.

1942-йисан майдиз Гьажимуслим Азербайжандай армиядиз тухвана. Тиф­лис шегьердиз акъатай  аскерди ра­диотелеграфистрин курсара кIелна. Ина Гьажимуслимни кваз пуд касдикай ибарат радистрин десте туькIуьрна ва ам Кеферпатан Кавказдин фронтдиз рекье туна. А вахтунда немсерин ният, Сухуми, Гагра шегьерар кьуна, ахпа Бакудин нафтIадин мяденар къачун тир. Къизгъин дяве физвай вахтунда ада немсер авай чкайрикай вичин полк хабардарзавай. Кавказ немсерикай азад авурла, Гьажимуслима къуллугъзавай полк Гагра шегьердин патарив акъудна, дивизиядин штаб Азербайжанда акъвазна. Гь.Гьажимуслимова штабдихъ галаз ара датIана алакъа хуьз хьана. Тапшурмишай кIвалах намуслувилелди кьилиз акъудунай Гьажимуслимоваз дивизиядин командирдин буйругъдалди кьве гьафтедин отпуск гана.

1943-йисан эхирра душмандин кьушунди кьулухъ чIугваз башламишна. И вахтунда Гьажимуслима къуллугъзавай подразделение 133 стрелковый бригададиз ракъурна, ахпа ам алакъа­дин кьилин 628-батальондик кухтуна. Гуьгъуьнлай ада къуллугъзавай батальон Эрменистандинни Туьркиядин сергьятдал алай Аракс вацIун къваларив рекье туна. А вахтунда Гьажимуслим радиовзводдин командир тир.

1948-йисан мартдиз хайи хуьруьз хтай ада Дербентдин педучилищеда кIелун давамар хъувуна. Гьа са вахтунда Агъа Хъартасрин юкьван мектебда муаллимвални авуна.

1950-1952-йисара Гь.Гьа­жимусли­мова Украинадин Львов шегьерда КГБ-дин кьве йисан школа куьтягьна, Дагъустандиз хтана, КГБ-дин органра кIвалахна. 1960-йисуз ада ДГУ-дин тарихдин факультет акьалтIарна.

1976-йисалай ада 10 йисуз Дербентдин горторгдин директордин заместителвиле, ахпа шегьердин газ квай чехирар хкуддай заводдин кадрийрин отделда зегьмет чIугуна.

Гьажимуслим Гьажимуслимов дя­ве­дин ва зегьметдин ветеран, Ватандин дяведин I дережадин ордендин, къа­далай виниз медалрин ва гьуьр­метдин грамотайрин, пишкешрин сагьиб я.

Адаз уьмуьрдин юлдаш Майтаба 4 рушни са хва багъишна. Абуру чпин веледриз кьилин образование къачудай мумкинвал гана. Светланади Москвада юридический академияда ингилис чIалан тарсар гузва. Наиля Дербентдин педколледж­дин директордин заместитель я, Мурада инженер-механик яз АЗИВ-да, Лейлади инженер-химик ва Жамиляди духтур яз кIвалахзава. Абуру диде-бубадин тербия кьуна, чпин веледарни шегьре рекьел акъудна.

Гъетягъвийри ихьтин камаллу рухвайрални рушарал дамахзава.

Вадим  Жамалдинов