Дяве. Гьикьван тIал, рикI къарсатмишдай гьарай, а кьил авачир умудсузвал гьакьзава и кьуд гьарфуна. Гьикьван экъичнавай ивияр, рикIерал хьанвай сагъ техжедай хирер чуьнуьх хьанва и гафуна. Дяведин вакъиайри ганвай азабар ва инсафсузвал садрани рикIелай алатдач. Чакай гзафбур дяведихъ галаз анжах чIехи дидейрин ва бубайрин — Ватандин ЧIехи дяведин ветеранрин суьгьбетрай, гьакIни тарихдин ктабрай, фильмайрай таниш тир. Дяведикай тир пашман ихтилатрихъ яб акалдайла, кьилиз анжах са фикир къведай: «Вуч хъсан тушни, чи вилериз ихьтин мусибатар аквазвач.
Амма, гьич гуьзлемиш тавур тIурфан хьиз, чи уьмуьрдиз мичIивал, телефвал гвай дяве гьахьна. Украинадин мулкунал чи кьушунрин къуватралди военный махсус серенжем кьиле тухуз йисалай виниз я. Ватандин саламатвал, хушбахтвал патал вишералди кьегьалри чпин чанар гузва ва агъзурралди аскерар женгинин майдандиз физва.
Ана зи халуни авай — Магьарамов Мурад Тагьирмирзеевич. Ада ГРУ-дин 24-гвардиядин 24-махсус бригадада къуллугъзавай. Ам Черниговда женгера хьана, ахпа адан бригада Донбассдиз акъудна. Халуди Ямболь, Яру Лиман, Кременной, Торский, Сватово шегьерар азад авунин женгера иштиракна. Ямполь патал кьиле фейи женгерилай кьулухъ адаз «Дирибашвиляй» медаль гана. Кьушунар цIийи чкайриз акъудунин гьерекат мад сеферда кьиле тухвайдалай кьулухъ зи халу Луганскдин Халкьдин Республикадиз акъатна. Ана Мурада Лисичанскдин ва Горское хуьруьн патав кIватI хьанвай ВСУ-дин 5 агъзур аскердикай ибарат армия элкъуьрна гьалкъада тун патал кьиле фейи къати женгера иштиракна. Лисичанскдин патав хьайи женгера халу душмандин артиллериядин цIук акатна ва адал хирер хьана. РФ-дин оборонадин министрдин буйругъдалди Мурад халудиз «Жуьрэтлувиляй» орден гана. Ада СВО-да 2022-йисан 24-февралдилай 2022-йисан 12-июлдалди иштиракна.
Халуди зун гъавурда турвал, рикIе шаклувилер хьайитIани, женг эхирдалди кьиле тухвана кIанда. Душмандин гьужумар алудун, абуруз жаваб гун патал гьар са аскердивай, командирдивай жуьрэтлувал, дирибашвал истемишзава. Эгер жуван къуват, къастунал кIевивал ва ватанпересвал къалур тавуртIа, женгерихъ бегьем нетижа жедач.
Сифте нубатда жувахъ жуван рикIе авай шаклувилерихъ ва кичIевилихъ галаз женг чIугуна кIанда, ахпа лагьайтIа, жув викIегь ва Ватандал рикI алай инсан яз къалурна кIанда, — лугьузва халуди.
Эгер месэла уьлкведин саламатвилиз талукьди ятIа, вири халкь тупламиш хьун лазим я. Анжах икI чавай чи рекьел пайда хьанвай вири манийвилерилай элячIиз жеда.
Изольда Мацаева, Билбил-Къазмайрин М.Абдуллаеван тIварцIихъ галай СОШ-дин 10-кл. ученица
