80-йисар тир. Зун Ахцегьа авай. Майдин юкьварилай алатнавай. За, гьамамдай хтана, халадин кIвале ял язавай. Халадин кефияр авачир, ада завай са жими-журу авун тIалабна.

— Мевлуьд нисинихъ хкведа, мумкин я, мугьманни галаз, гьавиляй чна гьазурвал акуна кIанда, — лагьана ада.

За шурвани авуна, тавада якни къавурмишна эцигна, чайни демда туна. Мевлуьд халу мугьманни галаз хтана. За суфра дуьзмишна, галай-га­лайвал – вири гъана эцигна. Халудихъ галай мугьман заз чидай кас тушир. Эхирдай суфрадал за як къавурмишнавай тава тухвана.

Тавадилай алахьзавай бугъ акурла, мугьманди гьасятда чIал туькIуьрна:

Къе гатфарин гьавадилай,

Бугъ алахьиз тавадилай,

Хуш ниэрив ацIурна кIвал,

Шихнесир я лагьайди чIал.

Заз гьасятда шаир чир хьана — мад зун гъавурда хтун герек амачир. Мевлуьд халу захъди элкъвена: — Хтул, вавай адаз жаваб гуз жезвачни? — Жезва, жезва, Мевлуьд халу. ЧIехи шаирдиз зи гафаралди жаваб гана за:

Тарих авай хуьруьн векил,

Ачух хьана къе зи гуьгьуьл,

И гуьруьшдал, чIалан заргар…

Буюр, ариф, суфра пайгар,

Дуьзмишайди я Аллагьяр…

Шаирди зав тикрар хъийиз туна… Ам зи чIаларилай рази яз амукьна. Ада икI лагьана: — Вахъ, хва, чIалан гьисс ава, кьилин макьсад гьам я, кIвалаха…

Шихнесир Къафлановахъ галаз­ кьи­ле фейи гуьруьшдикай кхьенвай гъве­чIи макъала заз адан 100 йисан юби­лейдиз бахшнавай шиирдалди акьал­тIариз кIанзава.

 

Хуьда ви ирс

Гьевес хьана хайи дагълар, уьруьшар,

Чи Эминан хвена даим еришар.

Шииратдин суфрадал на дигмишай,

ТIеамлубур хьана, гьелбет, емишар.

 

Эхь, алмасдин къилав авай чIалара,

Муьгьуьббатдин ялав авай чIалара,

Алван цуьквед атир авай чIалара,

ЧIехи Чилин къадир авай чIалара.

 

Ви илгьамдин чатук лигим хьайибур,

Дуьз цIарцIе тваз шегьре рекьел гъайибур,

Арифдин рехъ лап кIевелай хвейибур,

КукIушрава гьамгадин яд хъвайибур.

 

Шалбуз дагъдин шагьвар авай синерин,

КIанибурун ялвар авай рикIерин,

Сегьердин хуш нагъма авай нуькIерин,

Зар хуьзавай чи яйлахрин цуькверин.

 

Ви камалди руьгьдин гьиссер къелемдив,

МуьтIуьгъарна, машгьур хьайи алемдиз.

Къе асир я: ви мярекат уьтквемдиз

Тухуз чна, хуьз ви жафа эмекдин.

 

Икрамзава къе ви экуь къаматдиз…

Есирдавай ви чIаларин къуватдин,

Атанвай къе гьар са мугьман устадди,

И пак чилин илгьам къачуз къудратдин…

 

Чириз макьсад гьар са касдин рикIевай,

Аялдизни гьай лагьана хуьревай…

Сиришта хуьз ви несилар рекьева,

Ви ирс хуьнуьх чи гьар садан хивева…

Аллагьяр Абдулгьалимов