Дагъустандин МФЦ-дин идарайри карчивилел машгъулбуруз талукь яз РД-дин хуьруьн майишатдин ва недай суьрсетдин министерстводи малумарнавай конкурсда иштиракунин арзаяр кьабулзава.
Малумарзавайвал, карчийривай государстводин патай агъадихъ къейднавай хиляй куьмек къачуз жеда:
— шуькIуь ва са кьадар шуькIуь йис алай хиперилай твайи сар гьасилуниз авур харжарин са тайин пай эвез хъувун.
Арзаяр 19-июндилай 29-июндалди вугуз жеда. РД-дин МФЦ-дин кьилин идаради хабар гузвайвал, арза вугун патал арзачи меркездиз атунин гереквал авач. Мукьвал алай «Мои Документы» (МФЦ) идарадиз фена, субсидия къачуз жеда.
Куьмекдин такьатар гунин къайдадикай ва конкурсдин комиссиядин истемишунрикай галай-галайвал малуматар РД-дин хуьруьн майишатдин ва недай суьрсетдин министерстводин сайтдин «Гьайвандарвал» паюна чапнава.
Пишкешунин икьрар
Къанундалди пишкеш яз кьабулай юзан тийидай объект (кIвал, чил) хсусиятдиз элкъвезва, ам саналди къазанмишнавай умуми эменнидик акатзавач. Пишкешунин икьрар гьакъисузди ва кьве терефдинди я.
Пишкешунин икьрар МФЦ-дин идарайра туькIуьриз жеда. Ихьтин документар герек я:
— пишкешзавайдан ва пишкеш кьабулзавайдан паспортар;
— ЕГРН-дин выписка ва я ихтияррин государстводин регистрациядин гьакъиндай шагьадатнама;
— эгер икьрар туькIуьрунал ихтибарлу кас машгъул жезватIа, гьадал ихтибарзава лагьай доверенность;
— уьмуьрдин юлдаш санал къазанмишай эменни маса гунал рази я лагьай документ (согласие) ва я эвленмиш тахьанвайвилин гьакъиндай документ.
Эгер эменнидин сагьиб мукьва-кьили тушиз хьайитIа, государстводин къуллугъчийривай ихьтин пишкешар кьабулиз жедач.
Хсуси делилар кхьидач
2023-йисан 1-мартдилай къуватда гьатнавай Федаральный къанундал асаслу яз, ЕГРН-дай къачудай выпискайрал хсусиятчийрин ихтиярар авачиз абурукай делилар жедач. ИкI, юзан тийидай эменнидиз талукь выписка чара касди заказ ийизваз хьайитIа, Росреестрди хсусиятчидин тIвар, бубадин тIвар ва фамилия къалурдач.
Къанун къуватда гьатайдалай кьулухъ Росреестрдин векилри малумарайвал, цIийи къайда кардик кутунин макьсад кьадар авачир ксарикай ватандашдиз талукь хсуси делилар хуьн я.
«2023-йисан 1-мартдилай чарабуруз (пуд лагьай ксариз) хсусиятчидикай малуматар анжах хсусиятчидин ихтиярдалди, ада ЕГРН-диз талукь тир кхьинар авунин гьакъиндай арза вугайтIа, анжах гьа дуьшуьшда малумарда», — лагьанва Росреестрдин векилдин малуматда.
«Лезги газет»
