Эхь, чпелай чешне къачуниз лайихлу гъвечIи пагьливанарни авайди я. Квез и шикилдай (вичин тренердихъ галаз) аквазвай Жабраил Нисредован ери-бине СтIал Сулейманан райондин, алай вахтунда ЦIийихуьруьз куьч хьанвай, ЦIарахуьряй я. Ам 2016-йисуз Махачкъалада Насрудин муаллимдин хизанда дидедиз хьана. Алай вахтунда ада меркездин 46-нумрадин юкьван школадин 2-класс акьалтIарнава.
Гьеле аялрин бахчадиз фидай чIавузни Жабраил гзаф активный аял тир. Ана кьиле тухузвай шад межлисра ада шиирар кIелдай, спортдин серенжемрани викIегьдаказ вичин алакьунар къалурдай. Школадани ам ихьтин крара кьулухъ акъваззавач. Хъсан кIелзава, вич хъсан терефрихъай къалурзава. Школадиз фейила аялди вичиз спортдал рикIивай машгъул жедай къаст авайди малумарна. Гьа икI, Жабраила Дагъустандин Ояма-Каратэдай федерациядин президент, РД-дин физический культурадин лайихлу работник, каратэдай чIулав чIулунин (2-дандин) сагьиб Рагьимов Хизри Заруллагьовичан гъилик вердишвилер къачуз гила кьве йис тамам жезва. Амма алатнавай са куьруь вахтунда адалай вич кIевелай умуд кутаз жедай, спортдал рикI алай, четинвилерихъай кичIе тушир аял яз субутиз алакьнава. ИкI, клубдин сергьятра аваз мукьвал-мукьвал кьиле тухузвай акъажунра ада вичин артуханвал садрани-кьведра субутнавач. Яваш-яваш ада республикадилай къеце кьиле тухузвай акъажунрани иштиракзава. ИкI, 16-18-июндиз каратэкекусинкайдай, «Кубок Домбая» лишандик кваз, Карачаево-Черкесияда кьиле фейи Кеферпатан Кавказдин регионрин уртах турнирда (ана 5 субъектдай тир 11 командадик кваз саки вишев агакьна каратистри иштиракна) Ж.Нисредова 20-25-кг-дин заланвал авайбурун арада (8-9 йисарин категорияда) 2-чка кьуна.
Чаз чир хьайивал, яшар гьеле гъвечIи тирвиляй, Ж.Нисредовавай Россиядин Кубок патал, маса уьлквейра кьиле физвай турнирра (анра иштиракун патал яшар 9-далай алатун герек я) гьелелиг иштиракиз жезвач.
Къуй чи гъвечIи ва чIехи пагьливанрихъ дуьньядин спортдин кесерлу майданра мадни еке агалкьунар хьурай!
Рагнеда Рамалданова
