19-июндиз Бахрейндай чав муштулух агакьна. Brave CF 71 лигадин турнирдин сергьятра аваз, кьилинбурукай сад яз Велимурад Алхасова Николас Хвендедихъ галаз кьиле тухвай бягьсина судьяйрин сад тир къарардалди гъалибвал къазанмишна.
Жегьил тешкилат тир Brave CF (2016-йисуз ам шейх Халид бен Хамад Аль Хилафа арадал гъана) лигадин турнирда чи ватанэгьли идалай виликни (адаз Флавио де Куэрос кумукьнай) гъалиб хьанай, а чIавузни судьяйри чи ватанэгьлидин артуханвал къейднай.
РикIел хкин: вичин ери-бине Мегьарамдхуьруьн райондин Бут-Къазмайрилай тир женгинин самбодай Россиядин, дуьньядин чемпион, Россиядин спортдин мастер В.Алхасова Махачкъалада «КНК Дагъустан» клубда Эльдар Эльдарован ва Эсед Эмирагъаеван регьбервилик кваз вичин устадвал хкажзава. Пешекарвилин спортда чи ватанэгьлиди вири санлай гила 9 бягьс кьиле тухванва, абурукай анжах сада ам (судьяйрин сад тушир къарардалди) кумукьна. Африкадай тир Н.Хвендеди 6 бягьс кьиле тухванвай, икьван гагьди ада вири гъалибвилералди акьалтIарнавай.
Рагнеда Рамалданова
