Алатай гьафтеда Ахцегь райондин кьил Абдул-Керим Палчаева ЦIийи Усурринни Гъуьгъвезрин жемятрихъ галаз гуьруьшар кьиле тухвана. И хуьрериз муниципалитетдин кьилихъ галаз санал Луткунрин ва Хуьруьгрин кавхаяр — Амирхан Рагьимовни Ибрагьим Мегьамедов, образованидин управленидин начальник Халидин Эльдаров, райондин депутатарни мугьман хьанвай.
Къейд ийин хьи, кьве хуьрени гьялна кIанзавай месэлаяр гзаф ава. Асул гьисабдай абур ЦIийи Усуррихъни Гъуьгъвезрихъ къени «хуьруьн поселение» дережа (статус) тахьунихъ галаз алакъалу я. И кар себеб яз чкадин агьалийривай чпин кIвалера прописка ийиз, газдалди таъминарунин программайра иштиракиз жезвач, я хуьрера яшайишдин жигьетдай кьетIен метлеб авай объектар эцигдай мумкинвални авач.
Кьилди къачуртIа, ЦIийи Усуррин жемят мукьвал-мукьвал эквер хкатуникай икрагь хьанва. Абуру райондин кьилиз и месэла гьялна акьалтIарун патал цIийи кьве трансформатор эцигунин игьтияж авайдакай хабар гана. Идалайни гъейри, хуьре дигидай цин кьитвал ава, акьалтзавай несилриз тербия, чирвилер гунин кIвалах гуьнгуьна тун патал алай аямдин истемишунриз жаваб гузвай аялрин бахча, мектеб, спортдин майдан, мектебдиз автобус герек я.
Жемятдин суалриз жавабар гудайла А.-К.Палчаева къейд авурвал, «хуьруьн поселение» дережа авачирвиляй, гьелелиг цIийи мектеб, аялрин бахча эцигунин месэла гьялиз жедач. Ада и кардин патахъай вичи республикадин Кьил Сергей Меликовазни хабар ганвайдакай лагьана. Райондин регьберди образованидин управленидин начальникдал хуьруьн мектебдиз автобус чара авунин ва спортдин майдан кардик кутунин месэлаяр гьялдай рекьер веревирд авун тапшурмишна. Хуьрерин кьилериз 1 августдалди цIийи трансформаторрин месэла агалун ва 2 гьафтедин къене чкадин агьалияр дигидай целди таъминарун буйругъна.
Гъуьгъвезрин хуьрени ЦIийи Усуррин хуьре авай хьтин татугайвилер ава. Мадни, гъуьгъвезвийри чкадал фельдшер авачирвиляй ва райондин духтурхана яргъа авайвиляй, агьалийрив герек чIавуз медицинадин рекьяй куьмек вахтунда агакь тийизвайдакай хабар гана.
Абдул-Керим Палчаева чкадин администрациядин кьилиз энгел тавуна цихъ ва экверихъ галаз алакъалу месэлаяр гьялунив эгечIунин тапшуругъ гана. И крариз пулдин такьатар муниципалитетди чара ийидайвал я. Медицинадин куьмек вахтунда агакь тавунин месэла гьялун райондин кьили РД-дин здравоохраненидин министерстводин векилрихъ галаз веревирд ийидайвал я. Гъуьгъвезрин хуьруьн мектебдизни автобус чара ийидай мумкинвал акунин месэла образованидин управленидин начальник Халидин Эльдаровал тапшурмишна.
Къейд ийин хьи, 20-июндиз республикадин вице-премьер, РД-дин чилин ва эменнидин алакъайрин рекьяй министр Заур Эминова ЦУР-диз (Центр управления регионом) интервью гузвай чIавуз Ахцегь райондин Гъуьгъвезрин хуьруьз «хуьруьн поселение» дережа гунин месэла кудна. Ада хабар гайивал, и хуьр гьайванар хуьзвай къишлахрин мулкарал ала. И кардихъ галаз алакъалу яз, чкадин агьалийрал яшайишда гзаф кьадар четинвилер ацалтзава. РД-дин чилин ва эменнидин алакъайрин рекьяй министерстводи Ахцегь райондин администрациядин и месэладиз талукь тир теклифарни рекье тунвай.
«Арадал атанвай гьалара тайин тир дегишвилер тун патал чкадин самоуправленидин органрин патай официальный теклиф хьун герек я. Эфир куьтягь хьайидалай кьулухъ зун мад сеферда Ахцегь ва Мегьарамдхуьруьн районрин кьилерихъ галаз алакъадиз экъечIда лагьана за гаф гузва. Абуру Гъуьгъвезрин хуьруьз ихтилат физвай дережа гун патал администрацийрин патай герекзавай теклифар жезмай кьван фад агакьардайвал», — къейдна Заур Эминова.
Якъин жезвайвал, районрин администрацийри гьикьван фад герек тир теклифар гайитIа, гьакьван фад месэлани гьялиз жеда. Абдул-Керим Палчаева хуьрерин жемятрихъ галаз кьиле тухвай гуьруьшрилай кьулухъ и кардик, гьакъикъатдани, юзун акатдай умудар кутазва.
Агьмед Магьмудов
