23-июндиз Докъузпара райондин ЦIийи Къаракуьре хуьре мехъеррин “Марьям” тавханада алимрин ва райондин агьалийрин иштираквал аваз диндин межлис кьиле фена. Аллагь рази жедай мярекатда Кьиблепатан Дагъустанда РД-дин Муфтиятдин векил Агьмад Гьарунова, Докъузпара райондин имам Валиюллагь Баласиева, Мегьарамдхуьруьн райондин имам Агьмад Мегьамедова, Сулейман-Стальский райондин имам Гьасан Амаханова, Дербент районда РД-дин Муфтиятдин марифатдин отделдин руководитель Къурбан Рамазанова, Докъузпара районда РД-дин Муфтиятдин марифатдин отделдин руководитель Абубакр Аливердиева, экономикадин илимрин доктор Мугьаммад-Букар Гьамидулаева, жегьил шаир Владик Батманова ва райондин агьалийри иштиракна.
А.Гьарунова вичин рахунра къейд авурвал, мусурманар неинки чеб-чпихъ галаз, гьакI маса динэгьлийрихъ галазни хъсан рафтарвилера хьун важиблу я, эгер абуру Исламдиз зарар гузвачтIа. — Гьуьрметлу мусурманар, эгер чна чун Ислам динди истемишзавай къайдада тухуз хьайитIа, чилел уьмуьр бахтлуди ва Аллагь чалай рази жеда, — къейдна ЮТО-да Дагъустандин Муфтиятдин векилди.
Межлис Саид Гьамидова ва “Хайрат” дестеди нашидар кIелуналди ва алимри вязер авуналди давам хьана.
Алибуба Эмирсултанов
