Чеб авай чкадилай аслу тушиз, чи миллетдин векилриз уьмуьр лайихлудаказ тухунин ва къуллугъ гьакъисагъвилелди кьилиз акъудунин кьетIенвилер хас я.
Ватандивай яргъа Тюменский областдин Тобольск шегьерда гзаф йисара духтурвалзавай Аслан Бугьадинович Рустамовни кагьулвални инжиклувал течир, хкягъай пешедал рикI алай пешекар я.
Алай вахтунда ам Тюменский областда медицинадин лап хъсан къуллугъчийрин жергеда ава. Идан гьакъиндай гьахълудаказ шагьидвалзавай делил ам я хьи, Тюменский областда министерстводин ва губернатордин патай вини дережадин наградадиз лайихлу хьайи медицинадин лап хъсан 23 работникдин арада Аслан духтурни ава. Областдин 3-нумрадин азарханадин травматологиядин отделенидин заведующий яз кIвалахзавай чи ватанэгьли “Здравоохраненидин отличник” лишандалди къейднава. Къенин юкъуз Аслан духтур Тобольск шегьерда лап хъсан хирургрикай сад я.
Аслан 1962-йисуз Сулейман-Стальский райондин Ичинрин хуьре дидедиз хьана. Хирургиядиз ада гьеле мектебда кIелзавайла итиж ийизвай.
— Хуьруьн мектебда кIелзавай чIавуз заз “Хирургия” тIвар алай журнал авайдакай чир хьана ва ам за подписка авуна, — рикIел хкизва духтурди. — За а журнал мектебдиз тухуз ва картинкаяр къалуриз хьана. Ана чапнавай вири макъалаяр кIелзавайтIани, зун гъавурда саки акьазвачир. Гьар гьикI ятIани, а чIавуз за хирургдин пеше къачун кьетIна.
Хайи хуьруьн мектеб лап хъсан къиметралди куьтягьай Аслан Рустамов Махачкъалада Дагъустандин медицинадин институтдик экечIна. Хуьряй фенвай жегьил тирвиляй сифтедай Асланаз регьятни тушир. Амма сад-кьве йисалай ада хирургиядин предметдай имтигьанар анжах “вадралди” вахкуз хьана.
Мединститут куьтягьай жегьил пешекар 1986-йисуз Тюменский областдиз рекье туна. Тюменда ада са йисуз интернатурада кIелна ва 1987-йисалай Тобольск шегьерда хирург яз кIвалахиз башламишна.
— СССР чкIайдалай кьулухъ бегьем мажибарни авачиз, хизан хуьн саки четин хьанай, — рикIел хкизва Аслан духтурди. — Гьихьтин четинвилера гьатнатIани, маса кIвалах жагъуруникай гьич фикирни авунач. Зи кIвалах за виридалайни лайихлуди, гьа са вахтунда четиндини яз гьисабзава.
Аслан Бугьадиновича травматолог-ортопед яз кIвалахиз гзаф йисар я. И девирда ада къад агъзурдалай виниз операцияр, гьа жергедай яз лап четинбурни ийизва. Лезги духтур Тобольск шегьерда медицинадин хиле сифте яз алай аямдиз талукь цIийи жуьредин тадаракрикай менфят къачуник кьил кутурбурукай сад я.
2010-йисуз Аслан Рустамова “Транскраниольная магнитная стимуляция в лечении больных в вегетативном состоянии после черепно-мозговой травмы” темадай Москвада диссертация хвена ва медицинадин илимрин кандидатвилин дережа къачуна. Ам исятдани авай чирвилерал рази хьана акъваз тавунвай, датIана илимдал машгъул, вахт-вахтунда Москвада, Санкт-Петербургда, Тюменда, Курганда пешекарвилин дережа хкажзавай, регионрин ва вири халкьарин конференцийрани симпозиумра иштиракзавай пешекар я. Духтурди гьар юкъуз 4-5 операция тамамарзава, травматологиядин отделенидиз къвезвай гележегдин хирургризни тежриба чирзава.
Адаз Россиядин жуьреба-жуьре пипIерай, гьатта къецепатан уьлквейрайни сагъар хъувурбурун патай алхишдин чарар, зенгер къвезва.
Къейд ийин, лезги духтурдин адресдиз Интернетдин махсус сайтдани гзафбуру хуш келимаяр кхьенва. Къуй халис пешекардихъ кIвалахда мадни агалкьунар хьурай!
Куругъли Ферзалиев
