Дербент шегьердин 9, 11, 12, 15, 20-нумрайрин юкьван школайра гатун лагерар ачухнава. Къейд авуна кIанда, алай йисуз, 7-нумрадин махсус школа-интернатдин бинедаллаз сагъламвилин мумкинвилер сергьятламиш тир аялар патал инклюзивный смена кардик акатнава.
ИкI, алай йисуз ачухнавай лагерра 7-15 йисан яшарин 600 аялди ял яда.
Лагерар ачухзавай мярекатра Дербентдин депутатрин собранидин председатель Гьасан Мирзоева, шегьердин кьилин заместитель Видади Зейналова, образованидин управленидин начальник Чимназ Алиевади, школайрин директорри, жемиятдин тешкилатрин векилри иштиракна.
Анрал рахайбуру аялриз гатун каникулрин вахтунда хъсандиз ял яна, сагъламвал мягькемарна, сад лагьай сентябрдиз цIийи къуватралди школадиз хтун алхишна.
Лагерра алава образованидин идарайрихъ галаз санал культурадин, спортдин мярекатар ва конкурсар тухудай план гьазурнава. Сагъламвилин кампания, йикъа кьве чIавуз чими тIуьн гуз, 21 югъ аваз, кьве сменада кьиле фида.
Къагьриман Ибрагьимов
