Накь, 12-июндиз, СтIал Сулейманан райондин школайра ачухнавай лагерра Россиядин йикъаз талукьарнавай шадвилерин мярекатар кьиле фена.

Эминхуьре ва Цмурдин школайра тешкилнавай суварин мярекатра райондин кьил Саид Темирхановани иштиракна.

Мярекатар уьлкведин государстводин пайдах хкажунилай ва Россиядин Федерациядин гимн тамамарунилай башламиш хьана.

Гуьгъуьнлай мярекат чирвилер гунинни къугъунрин программайралди, спортдин ва музыкадинни кьуьлер авунин нумрайралди, конкурсрални викторинайралди давам хьана.

Саид Темирханова аялриз ва тербиячийриз уьлкведин кьилин сувар — Россиядин югъ тебрикна ва адан важиблувиликай ихтилатна.

«Заз кIанзава, — къейдна ада вичин рахунра, — чи гележег тир аялар бубайрин хъсан адетриз вафалубур яз чIехи хьана — абурукай халис ватанпересар хкатдайвал. ЧIехи бубайрин адетар, жуван уьлкведин тарих  чиз ва  чеб и зурба ватандин – Россиядин гражданар тирди гьисс авуна, кьилел ислягь ва михьи цав алаз квекай  бахтлу уьмуьрдин инсанар хьун зи мурад я»,-  лагьана Саид Темирханова.

Эльвира Небиева, ДГУ-дин филологиядин факультетдин 4-курсунин студентка