6-июндиз Махачкъалада «Совет муниципальных образований» Ассоциациядин правленидин заседание кьиле фена. Ана РД-дин Кьилин ва Гьукуматдин Администрациядин регьбер Алексей Гьасановани иштиракна.
Вичин рахунра Алексей Гьасанова чкадин агьалийрин яшайишдин шартIар хъсанарунин жигьетдай разивализ жедай нетижаяр къазанмишзавай муниципалитетрин тIварар кьуна. Кьилди къачуртIа, абурун арада Хасавюрт, Казбековский, СтIал Сулейманан, Табасаран, Хив, Хунзах, Агъул, Къаякент районарни Хасавюрт, Къизляр, Къизилюрт, Дербент ва Буйнакск шегьерар ава. Ада кIвалахдин жуьреба-жуьре рекьерай кьулухъ галамай районринни шегьеррин кьилериз вилик фенвай муниципалитетрилай чешне къачуниз эвер гана.
ГьакIни Алексей Гьасанова менфятлудаказ кIвалахунай са жерге муниципалитетрин кьилерив РД-дин Кьилин садавай масадав вугузвай (переходящий) лишанни 1-дережадин дипломар вахкана. Шегьеррин арада и шабагьриз Дербент, кьакьан дагълух зонада – Лак, дагълух зонада – Леваши, дагъларин ценерив гвай зонада – СтIал Сулейманан ва дуьзенлух зонада Хасавюрт районар лайихлу хьана.
Чи мухбир
