КIвачин къапар акъудунал машгъул жезвай Дагъустандин чIехи пуд компанияди, 2022-йисан нетижайралди, умуми къиметдин кьадар 550 миллион манатдив агакьзавай продукция акъуднава. Идакай «Дагъустандин экономика» телеграм-каналди хабар гузва.
Дагъустандин промышленностдин министерстводин пресс-къуллугъдин делилралди, ихтилат физвай фабрикайрин арада «SERG», «Maratti» ва «БОФФ» ООО-яр ава.
Ведомстводин пресс-къуллугъдин векилди алава хъувурвал, Дагъустанда акъудзавай кIвачин къапар онлайн-алишверишдин, маркетплейсдин куьмекдалди, федеральный министерствойрихъ галаз кутIуннавай государстводин заказрин сергьятра аваз маса гузва.
Идалайни гъейри, Дагъустан уьлкведа чекмейрин кIанерихъ (подошва) галаз алакъалу пресс-формаяр акъудзавай тек са регион я. И кIвалах Италиядай тир пешекаррихъ галаз санал Буйнакскдин фабрикада кардик кутунва. Нетижада и карханади алатай йисуз, санлай къачурла, 179,2 миллион манатдин къиметдин кьадарда аваз чекмеяр акъудна.
«Лезги газет»
