Дагъустандиз 4-июндиз Узбекистан Республикадин Олий Мажлисдин Сенатдин Председателдин Сад лагьай заместитель Садык Сафаев кьиле аваз делегация атана. Идан гьакъиндай «Лезги газетдиз» РД-дин Гьукуматдин пресс-къуллугъди хабар гана.

Гьуьрметлу мугьманар Махачкъаладин аэропортуна РФ-дин Федерациядин Советдин илимдин, образованидин ва культурадин рекьяй Комитетдин председателдин сад лагьай заместитель Ильяс Умаханова, Дагъустан Республикадин Гьу­куматдин Председателдин заместитель Ризван Гъазимегьамедова, РД-дин Халкьдин Собранида Дагъустандин Кьилин векил Нуьсрет Омарова, РД-дин Халкьдин Собранидин Председателдин Сад лагьай заместитель Юрий Левицкийди, РД-дин милли сиясатдин ва динрин крарин рекьяй министр Энрик Муслимова, РД-дин экономикадин ва мулкар вилик тухунин министр Гьажи Султанова ва Махачкъалада авай Россиядин МИД-дин векил Марат Османова къаршиламишна.

5-июндиз Махачкъалада, Дуствилин­ кIвале, РД-дин Гьукуматдин Председатель Абдулмуслим Абдулмуслимова Уз­бе­кистан Республикадин Олий Мажлисдин Сенатдин Председателдин Сад лагьай заместитель Садык Сафаев кьиле авай делегациядихъ галаз гуьруьш кьиле тухвана­.

Мярекатдин эвел кьиляй Ильяс Умаханова мугьманар РФ-дин Федеральный Собранидин Федерациядин Советдин Председатель Валентина Матвиенкодин тIварунихъай тебрикна.

Дагъустан Республикадин премьер-министр Абдулмуслим Абдулмуслимова­ вичин тебрикдин гафуна инанмишвал­ къалурна хьи, и гуьруьшди Дагъус­тан­динни Узбекистандин арада яшайиш­дин­ни экономикадин хилерай кьве терефдизни хийирлу алакъаяр арадал гъида.

«Чна куьн Дагъустандин аваданлу ва мугьманперес чилел хушвилелди кьабулзава. Чун патал виликан Советрин Со­юздин республикайрихъ галаз ала­къа­яр хуьн ва абур мадни мягькемарун важиблу я.

Узбекистан хейлин йисара Дагъус­тандихъ галаз дуствилин ва алишверишдинни экономикадин, гуманитарный хилерай алакъа хуьзвай уьлквейрикай сад я. Шаз, 2021-йисав гекъигайла, кьве региондин арада алишверишдин кьадар 80 процентдин хкаж хьана. Экспортдиз ракъурзавай шейэрин кьадар кьве сеферда артух хьана. Чахъ инлай кьулухъни кьве терефдинни алишверишдинни экономикадин алакъаяр мягькемардай ва вилик тухудай еке мумкинвилер ава», — лагьана А.Абдулмуслимова.

РД-дин премьер-министрди Дагъус­тандинни Узбекистандин арада санал  кIва­лахуниз талукь гележегдин планри­кайни ихтилатна. Ада къейд авурвал­, рес­публикадивай Узбекистан шуьшедин­ ва кьезил промышленностдин про­дук­ция­далди, мебелдалди, электромеханический тадаракралди, малдин, лапагдин, къушарин якIаралди, балугъралди, минеральный ятаралди таъминариз жеда.

Премьер-министрдихъ яб акалайдалай гуьгъуьниз Садык Сафаева къейдна хьи, эхиримжи йисара Дагъустан дурумлувилелди виликди физва. Инвестицийрин кIвалахдик аквадайвал юзун акатнава. Къенепатан ва къецепатан жигьетрай четинвилер аватIани, республикади виликди камар къачузва.

«Эхиримжи са шумуд йисуз Узбекис­танда кIвалахар вилик фин патал еке ала­хъунар ийизва. Президент Шавкат Миромонович Мирзиёеван регьбервилик кваз Узбекистан дурумлувилелди вилик фин патал зурба программа уьмуьрдиз кечирмишзава. Государство идара авунин­ къайдайрани дегишвал твазва. Гьукумдин къуллугъчияр жергедин инсанриз мукьва жезва, абур гьар са кас патал ачух я.

Инвестицийрин кьадарни артух жезва. Эхиримжи 5-6 йисуз экономикадин хиле хъсан патахъ дегишвилер аквазва. Эгер 2016-йисуз ВВП 50 миллиард тиртIа, алай вахтунда 82 миллиард доллардиз барабар я. Гуьгъуьнлай къвезвай вад йисуз чна и рекъем 150 миллиард доллардив агакьардайвал я. Ихьтин дегишвилер экономикадиз азадвал гунихъ, хсуси карчивилиз рехъ ачухунихъ галаз алакъалу я. Эхиримжи кьуд йисуз МСП-дин карханайрин кьадар 4,5 сеферда артух хьана. Промышленностди, алай аямдин технологийриз талукь ва жуьреба-жуьре къуллугъар ийизвай карханайри хъсан нетижаяр къазанмишзава. Вири и крариз Узбекистандин Гьукуматди инвес­тицийрин ва бизнесдин гьалар хъсанарун патал кьабулнавай серенжемри куьмек гузва», — лагьана Садык Сафаева.

Узбекистандин делегация Дербент ше­­гьер цIийи хъувуниз талукьарнавай­ пландихъ галазни таниш хьана. Ам ДГУ-дин университетдиз фена. Делега­цияди 1970-йисан залзаладилай гуьгъуь­низ Ма­хачкъалада «Узбекистан» микрорайон эцигай узбек устIарриз хкажнавай обелиск ачухунин мярекатдани иштиракна.

Хийир Эмиров