«Хатасуз ва ерилу рекьер» милли проектдин сергьятра аваз, Докъузпара районда автомашинрин Мегьарамдхуьр-Ахцегь-Рутул рекьин 40 лагьай километрдилай 54 лагьай километрдал кьван мензилда ремонтдин кIвалахар кьиле тухузва. Идакай РД-дин транспортдин ва рекьерин майишатдин министерстводи хабар гузва.
«И рекьи кьуд район — Мегьарамдхуьруьн, Докъузпара, Ахцегь ва Рутул — алакъалу ийизва, ам гьакIни, Дагъустан Республикадин асул пар ацалтзавай рекьерин арада ва милли проектрин сергьятра аваз, 2023-йисуз ремонт ийидай рекьерин сиягьда, ийизвай харжийрал гьалтайла, сифте чкадал алайбурун жергеда ава», — лагьанва министерстводин малуматда.
Къейдзавайвал, ремонтдин сергьятра аваз, рекьин къат мягькемарунин кIвалахар кьиле тухузва. Рекьерин пешекарри гьакIни яд къерехдиз акъуддай къурулуш ремонтнава ва рекьин къерехарни туькIуьрзава. Алай вахтунда пешекарри къирединни бетондин эхиримжи къат туькIуьрунин кIвалахар бегьемарзава.
«Рекьера гьерекатдин хатасузвал таъминарун патал рекьерин алава лишанар, ракьукай гьазурнавай жугъунар ва ракьунни бетондин даяхар эцигзава. Гьар юкъуз объектдал 25 касди ва махсус 30 машинди (техникади) кIвалахзава», — хабар гузва чешмеди.
Ремонтдин кIвалахар, рекьин 14 километрдин мензил ишлемишиз вахкуналди, июлдин эхирра акьалтIарда. Им план-графикда къалурнавайдалай кьве вацран фад я.
Ж.Саидова
