Россиядин хуьруьн майишатдин министерстводин совещанидал хуьруьн майишатдин таъминвал авай чилерин федеральный карта-схема туькIуьрунин месэлаяр веревирдна. Видеоконференциядин къайдада кьиле фейи совещанида РД-дин чилерин ва эменнидин алакъайрай министрдин заместитель Гьабиб Жанаева иштиракна.
Чна идалай вилик хабар гайивал, Дагъустан 2023-йисуз чилер авай гьалдиз талукь делилар жедай система туькIуьрунин кIвалахар кьиле тухудай регионрин сиягьдик акатнава. Идалайни гъейри, жуьреба-жуьре чешмейра къалурнавай ва сад хьиз кьан тийизвай делилар арадай акъудда.
Картади тади гьалда чирдай мумкинвал гуда: хуьруьн майишатдин чилерин, гьа жергедай яз, менфят къведай чкайрин сергьятар; накьвадин жуьреяр ва абуруз талукь делилар; чилер ишлемишуниз талукь делилар.
Идалай вилик, рикIел хкин, РД-дин хуьруьн майишатдин ва недай суьрсетдин министрдин заместитель Шарип Шарипова хуьруьн майишатдин тайинвал авай чилер нетижалудаказ ишлемишунин месэла Дагъустан патал кар алайди тирдакай лагьанай. ГьикI хьи, ихьтин чилери республикадин мулкунин 86 процент тешкилзава. Чил ишлемишзавай ксарин, фермервилин ва маса жуьредин майишатрин кьадар гзаф хьун себеб яз, делилрин сад тир база тешкилунин игьтияж арадал атанва.
Ж. Саидова
