И мукьвара Ахцегь райондиз РД-дин тIебиатдин ресурсрин ва экологиядин министерстводин, талукь тир маса идарайрин векилрин десте мугьманвиле атана. РДК-дин тамашачийрин залда абур агьалийрихъ галаз гуьруьшмиш хьана. Мярекатдал райондин мулкунал “Самурский” тIвар алай Милли парк тешкилунин месэла веревирдна. Мярекат райадминистрациядин къвалав гвай административный комиссиядин жавабдар секретарь Маруф Тарханова ачухна ва кьиле тухвана.
Инал “ВНИИ Экология” ФГБУ-дин “Заповедное дело” центрадин руководитель Дмитрий Очаков, зегьметдин ветеранар тир Мелик Эмирбегов, Къардаш Мамалиев, Ахцегьрин край чирдай музейдин директор Агьмед Дагъларов ва масабур рахана. Абуру Хинерин дереда авай виликан геолого-разведкадин мяденрин туннелрай къвезвай зегьерлу химикатар квай яд вацIук акатзавайди, ам дигин ва хъун патал ишлемишуни чкадин агьалийрин сагъламвилиз пис таъсирзавайди, ихьтин гьал гзаф йисара давам жезватIани, талукь тир идарайри са жуьрединни серенжемар кьабул тийизвайди наразивилелди къейдна. Абуру гьакI Ахцегь райондин мулкунал тIебиат хуьнин метлебдин Милли парк тешкилунин тереф хвена ва чпин теклифарни гана.
Гуьруьшдин эхирдай М.Тарханова къейд авурвал, райондин агьалийривай Милли парк тешкилуниз талукь яз чпин теклифар, наразивилер, суалар, чарчел кхьена, са вацран вахтуналди райадминистрациядив агакьариз жеда.
Рагьидин Эминов
