Сулейман-Стальский районда хуьруьн майишатдин продукция гьасилунал карханайрихъ, лежбервилинни фермервилин майишатрихъ галаз санал 920-далай виниз арендаторарни машгъул я. Абуру кар алай “Нетижалу АПК” проект районда уьмуьр­диз кечирмишуник еке пай кутазва.

Райондин хуьруьн майишатдин ва суьрсетдин управленидин начальник Мегьамедзагьид Бабаева чаз лагьайвал, арендаторри асул гьисабдай багъманчивилин, уьзуьмчивилин ва магьсулдарвилин хилера зегьмет чIугвазва.

И йикъара чун Герейханован хуьряй тир  Жамила  Къарахановадин  (шикилда) арендадин участокдиз фена. Чаз малум хьайивал, ада саки 20 йисуз “Герейхановский” совхоздин багъманчивилин бригадада рабочийвиле намуслудаказ кIвалахна. 2002-йисуз ада 64 сотых чил 49 йисан муддатда арендада къачу­на, ана ичин, чуьхверин, алучадин, пIинидин, шуьмягъин багъ ку­ту­на. Иесивилелди гелкъуьн тешкилнавай, агротехникадин гьар са серенжем галай-галайвал ва еридивди кьиле тухузвай багъ чешнелу гьалда ава.

И йикъара Жамила пIинияр атIунал машгъул я. Экологиядин жи­гьетдай михьи продукция арендаторди гьа чкадал маса гузва­.

— Гьасилай емишар кьабулдай чкаяр районда авач, гьавиляй чун продукция гьа чкадал маса гуниз, муьштерияр жагъуруниз мажбур жезва, — лугьузва Ж. Къарахановади.

Чаз малум хьайивал, Ж.Къарахановадихъ багъдин участок хсу­сиятдиз къачудай ва багъларин майданар артухардай фикир ава.

Хазран Кьасумов