Мукьвара Дагъустандин здравоохраненидин министр Татьяна Беляевадин ва Мегьарамдхуьруьн кьил Фарид Агьмедован иштираквал аваз Чепелрин хуьре фельдшервилинни акушервилин пункт (ФАП) ачухна. Идакай «Лезги газетдиз» райадминистрациядин пресс-къуллугъди хабар гана. Къейд авун лазим я хьи, модульный ФАП «Здравоохранение» милли проектдин здравоохраненидин сифтегьан хел (звено) цIийикIа туькIуьр хъувунин программадин сергьятра аваз хкажнава.
Мегьарамдхуьруьн райондин мулкарал здравоохраненидин министерстводин регьбер ва адахъ галаз райондиз атанвай амай векилар Фарид Агьмедова чими келимайралди къаршиламишна. Чепелрин хуьруьн жемят патал чIехи метлеб авай медицинадин объект хкажуниз куьмекар гунай ада Татьяна Беляевадиз сагърай лагьана.
ЦIийи ФАП, адет тирвал, яру лент атIунилай ачухна. Ахпа республикадин парламентдин векилар ва райондин медицинадин хилен къуллугъчиярни галаз абур анин кабинетриз килигна.
Татьяна Беляевади къейд авурвал, цIийи ФАП-да медперсоналдиз кIвалахдай ва агьалийриз куьмекар гудай вири къулайвилер яратмишнава.
РикIел хкин: фельдшервилинни акушервилин пункт эцигдай чка 2021-йисан декабрдин вацра тайинарнавай. Са шумуд вацралай, 2023-йисан мартдиз, пункт эцигунин кIвалахар акьалтIна. Алай йисуз ам тамамвилелди тадаракламишна.
Кьилди къачуртIа, ФАП кабинетрикай (смотровой ва процедурайринни азарриз акси рапар ядай), духтурдихъ учирда акъваздай чкадикай, санузелдикай ва раздевалкадикай (медперсонал патал) ибарат я.
ФАП ачухайдалай кьулухъ министр Мегьарамдхуьре кардик квай райондин центральный больницадиз ва поликлиникадиз фена.
Медицинадин кьилин идарадиз килигайдалай кьулухъ Татьяна Беляевади Мегьарамдхуьруьн районда агьалийриз медицинадин куьмек тешкилнавай гьалдиз ва ам хъсанарун патал серенжемриз талукь месэлайрай коллегиядин заседание кьиле тухвана. Ана республикадин здравоохраненидин министерстводин векилри, райондин кьили, Мегьарамдхуьруьн ЦРБ-дин коллективди, райондин медицинадин хилен къуллугъчийри хьиз, Кьиблепатан Дагъустандин районрин ва шегьеррин больницайрин кьилин духтуррини иштиракна.
Заседанидин эхирдай къарагъарнавай месэлаяр веревирдна, министрди нетижаяр кьуна. Фарид Агьмедова мярекатда иштиракунай виридаз сагърай лагьана, район патал ихьтин серенжемдин менфятлувиликайни.
— Къенин юкъуз чаз райондин агьалийрив медицинадин къуллугъар агакьарунихъ галаз алакъалу яз кар алай хейлин месэлаяр веревирддай мумкинвал хьана. Лугьуз кIанзава хьи, тешкиллувилин кIвалах райадминистрацияди Мегьарамдхуьруьн ЦРБ-дихъ галаз сих алакъада, арада разивал аваз, сад-садав кьурвал таъминаруналди кьилиз акъудиз чалишмиш жезва. Гьелбетда, коллегиядал къарагъарнавай, веревирднавай хейлин месэлайри къенин юкъуз чпив пешекарвилелди эгечIун, медицинадин и хиле фадлай зегьмет чIугвазвай инсанриз къимет гун истемишзава. ГьикI хьи, медицинадин идарайрин кIвалах ахтармишдайла, адаз къимет гудайла, и хиляй куьмек агакьаруниз талукь жуьреба-жуьре делилар фикирда кьун герек я. Чна вирида санал ва вири хилерай кIвалах хъсанаруниз къуватар серфда, — къейдна ада.
Чи мухбир
