Ханты-Мансидин (Югра) автономный округда гзаф лезгийри зегьмет чIуг-вазва. Лугьузвайвал, Дагъустандилай алатайла, инаг лезгияр гзаф авай чка я. Анжах са Федоровск поселокда чи 500 ватанэгьлиди уьмуьр кечирмишзава.
Майдин эхиримжи йикъара Сургут райондин Федоровск поселокда яшамиш жезвай лезгийрин жемиятдин тешкилатди вичин къанни цIуд йисан юбилей шад гьалара, гзаф кьадар мугьманрин иштираквал аваз къейдна. Абурун арада ФЛНКА-дин Советдин председатель Ариф Керимов, ФЛНКА-дин президент Васиф Гьасанов, контрольно-ре-визионный комиссиядин председатель Шихмегьамед Мурсалов, советдин членар Жалауддин Абдуразакьов, Асрет Ибилкьасумов, Мегьамедали Муслимов ва масабур авай.
Шадвилин кьилин мярекат тухудалди вилик Федоровскдин «Жемчужина» спорткомплексда мини-футболдай «Жуванбурун кубок» патал акъажунар кьиле фена. Ана Тюмендин областдин лезгияр яшамиш жезвай Ноябрьск, Радужный, Сургут, Тюмень, Пойковск шегьеррин ва Федоровск поселокдин командайри иштиракна.
Майдандал къизгъин женгер тухвайдалай гуьгъуьниз «Дербент» (Ноябрьск) командади 1-чка кьуна. «Садвал» (Радужный) ва «Леки» (Тюмень) командаяр, тулукь тирвал, кьвед-ва пуд лагьай чкайриз лайихлу хьана.
Юбилейдин шад мярекат культурадин «Премьер» тIвар алай дворецда кьиле фена. Фойеда лезги чIалал акъатнавай ктабрин, газетрин, милли парталрин, хуьрекрин выставкаяр ачухнавай. Гьар садавай милли хуьрекрикайни дад акваз жезвай.
Лезгийрин жемиятдин тешкилатдин председатель Руслан Абдулаева мярекат ачухна ва виридаз юбилей тебрикна. Ахпа шаир Владик Батманова дидед чIалал «Зи бубайрин чилерал дамахда за» шиир кIелна.
Мярекат тебрикар, рахунар ара-ара сегьнедиз экъечIзавай устадрин манийралди, кьуьлералди дегишариз кьиле фена. Ариф Керимова Федоровскдин лезгийрин жемиятдин активный членар тир Руслан Абдулаеваз, Руслан Шерифоваз, Бахруз Асадоваз, Гьажи Аслановаз, Мамеджан Мамеджановаз, Саб-ри Теймуроваз, Самурхан Якьубоваз, Шихбуба Къарабеговаз грамотаяр гана.
А.Керимова, В.Гьасанова лезгияр Россиядин гзаф регионра авайдакай ва милливал, дидед чIал, адетар хуьн, абур акьалтзавай несилдал агакьарун важиблу кар тирди къейдна.
Федоровскдин лезгийрин жемиятдиз юбилей Сургут райондин администрациядин векил Оксана Александровади, поселокдин кьил Николай Рудышина, къумукьрин, ногъайрин, азербайжанрин, марийвийрин, татаррин, урусрин милли тешкилатрин председателар Алавудин Къурбанова, Арсланали Къарамурзаева, Мадар Мамедова, Юрий Таныгина, Шамиль Рахматуллина, Ирина Масленниковади тебрикна.
Мярекатдин иштиракчийрин гуьгьуьлар кьуьлердай «Кавказдин руьгь», «Халкьарин дуствал» ансамблри ва «Бахт» дестедин манидарри мадни ачухарна.
Абад Азадов
