Алибалаев Мирзехан СтIал Сулейманан райондин Кьулан СтIалрин Россиядин Игит Радим Халикьован тIварунихъ галай школадин 10-классдин ученик я. Хъсан зигьин, рикIе ашкъи авай гадади 1-классдилай хъсандиз ва 5-классдилай лап хъсандиз кIелзава.
Гьакъисагъ зегьметди бул бегьер гуда лугьудайвал, Мирзеханахъ чирвилерин ва спортдин рекьяй хъсан агалкьунар ава. И мектебдин организатор Эльфина Валеевнади тестикьарзавайвал, Мирзехана школадин общественный кIвалахра активнидаказ иштиракзава. Кьилди къачуртIа, жегьил-жаванрин арада тухвай кьуьлер авунин ва манияр ягъунин гьунарар къалурдай конкурсда “Лезгинка” кьуьл авунай Мирзехана 1-чка кьуна.
2019-йисуз Сардархуьре кьиле тухвай самбодин турнирда 1-чкадиз лайихлу хьайи адаз кубок, медаль ва грамота гана. ЦIи лагьайтIа, Мирзехана чи районда тарихдай тухвай олимпиадада 1-чка кьуна. Москвада кьиле фейи ведомствойрин образованидин идарайрин бинедаллаз (тешкилатчи — Россиядин ФСБ-дин академия) обществознанидай кьиле тухвай регионрин уртах олимпиадада ам 1-чкадиз лайихлу хьана.
Чешнелу ученикдин классдин руководитель Маина Мирзоевнади, обществознанидин ва тарихдин муаллим Назхалум ТIагьировади тестикьарзавайвал, муаллимри ва вири хуьруьнвийри кьегьал гададал дамахзава. Ам чирвилер къачунив гьевесдивди эгечIзава, тапшурмишай гьи кар хьайитIани, кьилиз акъудзава, гада тарсар кIелунинни спортдал машгъул хьунин карда вилик жергейра ава.
Чи мурад Мирзехан уьмуьрда еке агалкьунрив агакьун я. Кьегьал хва тербияламишзавай адан буба Казбеказни диде Заифадиз аферин лугьуз кIанзава.
Кьулан СтIалрин мектебдин дамах
Мирзехан кIелунрин яцIава.
Къазанмишиз аферин — чухсагъул,
Мирзехан тербиядин кьацIава.
Замир Мегьамедов,
Вини СтIал
