И йикъара СтIал Сулейманан районда, Цмуррин умуми образованидин мектебдин майдандал, чIехи классра кIелзавай аялрин арада, Россиядин физикадинни математикадин виридалайни жегьил доктор Заур Алисултановаз гьуьрмет авунин лишан яз, адан тIварцIихъ галаз алакъалу авуна, физикадай районрин уртах олимпиада кьвед лагьай сеферда кьиле тухвана.
Олимпиада ачухунин мярекатда СтIал Сулейманан райондин кьил Саид Темирханова, мергьяматлувилин “Иман” фондунин векил Мурад Ханбалаева, Дагъустандин илимдин центрадин чIехи къуллугъчи Заур Алисултанова, райондин образованидин управленидин начальник Гьуьсейн Шихбабаева, Цмуррин мектебдин директор Сергей Ежова иштиракна. Абуру олимпиададин иштиракчийриз вири имтигьанрай лайихлудаказ акъатун ва рикIе авай нетижайрив агакьун алхишна.
Образованидиз талукь тир и мярекат райондин администрацияди “Иман” БФ-дин финансрин куьмекдалди тешкилнавай. Адан макьсад мектебра кIелзавай аялрин итиж илимдинни ахтармишунрин кIвалахдал желб авун, абурун арадай бажарагълубур винел акъудун, абур патал лазим тир шартIар арадал гъун, физикадай илимдин чирвилер мектебра кIелзавай аялрин арада чукIурун, гьакIни образованидин хилен идарайри бажарагълу аялрихъ галаз алакъаяр туькIуьрунин къайдаяр хъсанарун, абур пешекарвилин жигьетдай гьазурунин карда куьмек гун я.
Олимпиадада СтIал Сулейманан, Мегьарамдхуьруьн, Кьурагь, Ахцегь, Докъузпара ва Хив районрай тир 10-11-классра кIелзавай 40 жаванди иштиракна. Оргкомитетдик ва пешекаррикай тир комиссиядик гьакIни ДГУ-дин преподаватель Заур Алисултанов, ДГУ-дин физикадин факультетдин декандин заместитель, физикадинни математикадин илимрин кандидат Гьажимирзе Рагьимханов ва РАН-дин физикадин институтдин илимдин кар алай къуллугъчи, физикадинни математикадин илимрин кандидат Адлер Гьамзатов квай.
Олимпиададин иштиракчийриз ганвай тапшуругъар умуми образованидин программайрин бинедаллаз гьазурнавайбур тир. Акъажунрин нетижайралди, 11-классра кIелзавай аялрин арада 1- чкадиз Докъузпара райондин Усугъчайдин СОШ-дин ученик Гуьлмегьамед Абдурагьимов, 10-классра кIелзавайбурун арада — Мегьарамдхуьруьн райондин ЦIийихуьруьн СОШ-да кIелзавай Диана Набиева лайихлу хьана.
Пишкешдин чкаяр 11-классрин аялрин арадай Шамил Тагьирова (СтIал Сулейманан райондин ЦIийихуьруьн СОШ) ва Имран Гьашумова (Ахцегьрин 1-нумрадин СОШ) кьуна. 10-классра кIелзавай аялрин арада пишкешар Милана Гьамзатовади (Мегьарамдхуьруьн райондин ЦIийихуьруьн СОШ) ва Мурад Идрисова (СтIал Сулейманан райондин Алкьвадрин СОШ) къачуна.
Олимпиададин гъалибчийриз ва пишкешдин чкаяр кьур аялриз, гьакI абур гьазурай муаллимризни мергьяматлувилин «Иман» фондунин патай грамотаяр ва пулдин пишкешар гана.
Амина Муслимова
