И мукьвара Дербентдин Д.Ашурован тIварунихъ галай муз­училищедин коллектив Кьасумхуьрел мугьман хьана. СтIал Сулейманан райондин агьалияр патал и югъ сувариз элкъвена. И.Тагьирован тIварунихъ галай культурадин дараматдин чIехи залда хъсандиз тешкилнавай ва гьазурнавай концертдин программа тамашачийри хушдаказ кьабулна.

Программа тамамарзавайбур училищеда кIелзавай студентар ва абуруз  чирвилер гузвай муаллимар тир. Кьилди къачуртIа, халкьдин алатрин оркестрди (регьбер — Н.Шихмурадов), духовой оркестрди (регьбер — А.Русакович), тар ядайбурун ансамблди (регьбер — А.Шихмурадов) кьасумхуьруьнвийрин ва мугьманрин гуьгьуьлар шадарна. Концертдин программада вокалдинни хордин «Элегия» ансамблдин (регьбер — Н.Шихмурадова) репертуардини еке чка кьунвай. Аник классикадин, эстрададин ва халкьдин манийрикай нумраяр квай. Сольный нумраярни чIагъандал, кларнетдал, тардал ва халкьдин алатрин ансамбдихъ галаз Наиля Шихмурадовади ва Наж­мудин Шагьбанова тамамарна.

Концертдин эхирдай музучилищедин директор Камила Магьмудовади вичин куьруь гафуна къейд авурвал, алатнавай йисара Дербентдин музыкадин училищеди (ам арадал атана 50 йис тамам хьанва, алай вахтунда ана 50 муаллимди тарсар гузва) хейлин пешекарар майдандиз акъудна. И важиблу кардик музучилищеда яргъал йисара зегьмет чIугвазвай ксар тир И.А.Ибрагьимова, М.Г.Хаирова, Ш.Д.Абрамова, А.Р. Мегьамедова,  Н.Б.Шихмурадова, А.З.Шихмурадова ва масабуру чпин лайихлу пай кутазва.

Хъсан алакьунар авай студентри республикадин ва Вирироссиядин фестивалра ва конкурсра иштиракзава. Абур дипломрин, грамотайрин ва маса пишкешрин сагьибар хьанва. Чаз абурун алакьунар, бажарагълувал, музыкадал рикI хьун ва му­зыка машгьурун акуна. Чухсагъул лугьуз кIанзава учили­щедин коллективдиз, чаз мугьман хьана, чи рикIер шад авунай.

Назифа Юркъулиева