Шахты шегьердикай делилар
Шахты Ростовдин областда авай, 158 квадратный километрдикай ибарат гъвечIи шегьер я. Ана 240 агъзурдав агакьна агьалияр яшамиш жезва. Абурукай 45 процентди промышленностдин карханайра зегьмет чIугвазва.
Виликдай и шегьердиз Александровск-Грушевский лугьузвай, Инкъилабдилай кьулухъ адаз “Шахты” тIвар гана.
И шегьер шахтайрин кIвалахралди, цIивиндин промышленностдалди ва виликан Олимпиададин чемпионралди машгьур я. Олимпиададин чемпионар гзаф акъатнавайвиляй шегьер “Гиннессан рекордрин ктабда” гьатнава.
2020-йисуз Шахты шегьердин 215 йис къейдна.
Промышленностдин, медениятдин, спортдин ва яшайишдин макан хьиз, Шахты шегьер активнидаказ еримлу хьана. Вири и крар таъминардай мумкинвал цIивиндин шахтайри гана.
1898-йисуз муаллим Чарячукина шегьердин кьетIен багъ кутуна. Исятда адаз “Александровский багъ” лугьузва.
Промышленностдин макан хьуниз килигна, шегьердин экология тарифдай гьалда авач.
Шахты игит шегьерни я. 1941-1945-йисара, фашистрихъни чапхунчийрихъ галаз женг чIугвадайла, гзаф инсанар телеф хьана. 1942-йисан июлдиз шегьер фашистри чапхунна, абуру шахтайрай тадаракар ва цIивинар хутахна. 1943-йисуз чапхунчи немсери шахтайрин техника барбатIна. Шегьер 1943-йисан 12-февралдиз полковник С.Левинан командованидик квай 258 лагьай стрелковый дивизияди азад хъувуна.
«Лезги газет»
