11-майдиз Махачкъалада, “Лезги газетдин” редакцияда, Алкьвадар Гьасанан тIварцIихъ галай медениятдинни марифатдин центради рамазандин вацра кьиле тухвай диндин конкурсдин гъалибчийрив савкьатар вахкуниз талукьарнавай мярекат кьиле фена.
Ана “Лезги газетдин” кьилин редактор, винидихъ тIвар кьур центрадин директор Мегьамед Ибрагьимова, конкурсдин жюридин председатель, диндин алим Ямин гьажи Мегьамедова, “Лезги газетдин” кьилин редактордин заместитель Куругъли Ферзалиева ва масабуру иштиракна.
Саки са вацра давам хьайи конкурсда Ахцегь, Мегьарамдхуьруьн, СтIал Сулейманан, Кьурагь районрай, Махачкъала, Санкт-Петербург шегьеррай “Лезги газет” кIелзавай ватанэгьлийри иштиракна.
Нетижада 1-чка Ахцегь райондай тир Абдулла Мегьамедова кьуна ва конкурсдин кьилин савкьатни (телефон) 15 агъзур манатдин кьадарда авай пулдин пишкеш адаз кьисмет хьана. 2-чка кьур Демир Шагьбанов (СтIал Сулейманан район) сятинизни 12 агъзур манатдин кьадарда авай пулдин пишкешдиз ва 3-чка кьур Ражидин Рагьимов (Ахцегь район) капI ийидай гъвечIи халичадизни 9 агъзур манатдин кьадарда авай пулдин пишкешдиз лайихлу хьана.
Идалайни гъейри, гъалибчийриз центрадин патай дипломар, Ямин гьажи Мегьамедован къелемдикай хкатнавай диндин ктабар ва “Зам-Зам” ятар гана.
Агьмед Магьмудов
