СтIал Сулейманан райондин общественный палатадин заседанидал районда здравоохраненидин къенин йикъан важиблу месэлайриз килигна. Адан кIвалахда муниципалитетдин кьил Саид Темирханова, адан заместителри, къурулушринни общественный тешкилатрин регьберри, райондин собранидин депутатри, хуьрерин поселенийрин администрацийрин кьилери, СМИ-дин векилри иштиракна.
Заседание ачухай общественный палатадин председатель Алимет Мейланова къейд авурвал, райондин кьил С.Темирханова районда здравоохраненидин идарайри агьалийриз медицинадин жигьетдай къуллугъ авун тешкилнавай гьалар, гьакIни здравоохраненидин къенин юкъуз важиблу месэлаяр ахтармишун общественный палатадал тапшурмишнава. Махсус дестеди и тапшуругъ кьилиз акъудна, ахтармишунар кьиле тухвана.
Заседанидал агьалийриз медицинадин рекьяй къуллугъ авун тешкилнавай гьалдикай ва здравоохраненидин организацийрин кIвалах хъсанарун патал кьабулзавай серенжемрикай райбольницадин кьилин духтур Жафер Къурбанисмаилова малумат гана. Ада къейд авурвал, медицинадин рекьяй агьалийриз са сменада 200 кас кьабулиз жедай райондин центральный поликлиникади, агьалияр йифенни йикъан вахтунда кьабулдай 152 ва йикъан вахтунда кьабулдай 35 чарпайдин стационарди, участковый больницади, 9 амбулаторияди, 13 ФАП-ди ва 15 ФП-ди къуллугъзава. Райондин агьалийрин кьадар, 2023-йисан 1-январдин делилралди, 55 агъзурдалай алатнава. Абурукай пенсионерар — 7494, зегьметдиз къабил ксар — 33875, 17 йисал къведалди яшара авай аяларни жегьилар 13772 кас ава.
Алатай йисуз “Сифтегьан звено цIийикIа туькIуьр хъувун” программадай Бутхуьре ва Зизика модульный ФАП-ар, КIварчагъа модульный (врачебный) амбулатория эцигна.
2022-йисуз ЦРБ-дин материально-технический базани мягькемарна. Винидихъ тIвар кьунвай программадай санитариядин транспорт маса къачуна. Мадни “Земский духтур” программадай пуд духтур — тади куьмекдин отделенидин, участокдин педиатр, оториноларинголог, са акушерка кIвалахал кьабулна.
Ж.Къурбанисмаилов медицинадин къенин йикъан важиблу вири месэлайрал, гьар са отделенидин, ФАП-рин кIвалахрални кьилди-кьилди акъвазна. Алакьнавай кIвалахрикай хьиз, ада гьялиз тахьанвай месэлайрикайни гегьеншдиз ва ачухдиз лагьана.
Общественный палатади райондин медицинадин идарайра тухвай ахтармишунрин нетижайрикай и тешкилатдин председателдин заместитель Ягъибег Ягъибегова гьахъ-гьисаб авуна.
Медицинадин рекьяй районда авай гьаларикай ва вилик кумай везифайрикай, чкайрал гьялиз тахьанвай месэлайрикай общественный палатадин член, Шихидхуьруьн юкьван школадин муаллим-тешкилатчи Къурбансмяли Пирвелиева, общественный хатасузвал хуьнин рекьяй райадминистрациядин кьилин заместитель Абуталиб Фатулаева, райадминистрациядин капитальный эцигунрин управленидин начальник Роберт Мейланова, КIварчагърин хуьруьн агъсакъалрин советдин член Зейнулагь Наврузова ва Алимет Мейланова рахунар давамар хъувуна.
Заседанидин нетижаяр Саид Темирханова кьуна. Ада муниципалитетдин здравоохраненидин къурулушда эхиримжи йисара хъсанвилихъ кьиле фенвай дегишвилер къейдна. Гьа са вахтунда ада гьялиз тахьанвай месэлайрал, рехъ гузвай кимивилерал, районда здравоохранение вилик тухун патал кьабулзавай серенжемрални фикир желбна.
Хазран Кьасумов
